ЧĂВАШСЕН пĕрремĕш профессиллĕ ỹнерçи Алексей Кокель çуралса ỹснĕ ялта - Турханта - тепĕр паллă çын хăйĕн пултарулăхĕпе савăнтарать. Вăл - Татьяна Кокель (Пирожкова). Татьяна Николаевна хăйĕн хушма ятне ытахальтен псевдоним вырăнне суйласа илмен. Ача чухнех районта тухса тăракан "Авангард" хаçатра унăн сăввисем пичетленетчĕç. И.Н.Ульянов ячĕллĕ Чăваш патшалăх университетĕнчи журналистика факультетĕнче вĕреннĕ вăхăтра вăл творчество каçалăкĕнче пысăк ỹсĕм тума пикеннĕ, сăвă кĕнеки пичетлесе кăларнă. Юхпапа Пăла тăрăхĕн чиперкки аслă шкултан хĕрлĕ дипломпа вĕренсе тухнă хыççăн малтан аспирантурăра пĕлĕвне тăснă, наука ĕçĕнче пултарулăхне малалла туптаса кандидат диссертацине хỹтĕленĕ. Хальхи вăхăтра ЧПУн преподавателĕ, филологи наукисен кандидачĕ.

Татьяна Кокель чылай наука статйипе пĕрлех икĕ сăвă кĕнеки пичетлесе кăларнă. Çак кунсенче ентешĕмĕре чыс туса тăван ялĕнчи вулавăшра йĕркеленĕ литература каçĕнче унăн сăввисене шкул ачисем кăмăлтан вуланă. Чăваш чĕлхипе литературине вĕрентекен В. Самаринапа А. Шелякова мероприятие хутшăннисене автор пултарулăхĕпе, пурнăçĕпе тĕплĕн паллаштарнă.