Çулсем хупăнаççĕ

Мартăн 22-мĕшĕнчен пуçласа Чăваш Енре пысăк тиевлĕ машинăсене регион тата муниципалитет пĕлтерĕшлĕ автомобиль çулĕсемпе çÿреме чарĕç. Чăваш Республикин транспортпа çул-йĕр хуçалăхĕн министрĕ Владимир Осипов палăртнă тăрăх, асăннă чару пассажир автобусĕсене, çимелли, чĕр чунсене, эмел, им-çам, топливо, вăрлăх, почта турттаракансене, РФ Оборона министерствин транспортне, чрезвычайлă лару-тăрура пулăшма васкакан йывăр тиевлĕ машинăсене пырса тивмест. Чару вăхăтĕнче автомобиль çулĕсемпе çÿреме ирĕк илес тесен вара Чăваш Республикин автомобиль çулĕсен управленийĕн тараса тĕрĕслевĕн пайне каймалла.

Сывлăхпа спорт кунĕсем

Чăваш Республикн Министрсен Кабинечĕн йышăнăвĕпе  2021 çулти Сывлăхпа спорт кунĕсене палăртнă. Чăваш Енре пурăнакансем çав кунсенче республика тата муниципалитет спорт сооруженийĕсенчи бассейнсене, спорт площадкисене, тренажер залĕсене,  хоккей лапамĕсене тÿлевсĕрех кĕме май пулать. Сывлăхпа спорт кунĕсем: мартăн 27-мĕшĕ, апрелĕн 24-мĕшĕ, майăн 22-мĕшĕ, июнĕн 19-мĕшĕ, июлĕн 24-мĕшĕ, августăн 21-мĕшĕ, сентябрĕн 25-мĕшĕ, октябрĕн 23-мĕшĕ, ноябрĕн 27-мĕшĕ, декабрĕн 18-мĕшĕ.

Библиотекăна –хаçат çырăнма

Чăваш Енре вулавăшсене çÿрекенсем унтах хаçат-журнал çырăнма пултарĕç. «Пурнăçшăн – 200 кăларăм» акци Раççей Культура министествипе Раççей Почти пуçарнипе апрелĕн 1-мĕшĕнчен ĕçлеме тытăнĕ. 200 кăларăм шутне Раççей Почтин çырăнтару каталогĕнчи обществăпа политика хаçачĕсене, ăслăлăх кăларăмĕсене, ача-пăча хаçат-журналне кĕртнĕ. Юратнă кăларăма çырăнас тесен ятарлă QR-кода сканерламалла. Унтан клиент Раççей Почтин çырăнтару онлайн-каталогĕн страницине лекĕ.

Вутă хатĕрлес ĕçри çĕнĕлĕхсем

Январĕн 1-мĕшĕнчен пуçласа Раççейре вутă хатĕрлес йĕркене улшăнусем кĕртнĕ. Вут-шанкă пуçтарнă чухне халĕ алă инструменчĕсемпе (ал пăчки, пуртă, çăмăл бензопăчкă) усă курма юрать. Хăрăк турата çулталăк тăршшĕпех пуçтарма май пур. Саккунпа килĕшÿллĕн çĕр çинче выртакан йывăç вуллисене, турачĕсене тата хăй тĕллĕн пĕтнĕ йывăçсене пуçтарма юрать.