Манăн кукамая Марье тесе чĕнеççĕ. Вăл Кĕçĕн Чемен ялĕнче пурăнать. Хаклă çыннăмăр Тĕрлемесре вĕренсе бухгалтер профессине илнĕ. 37 çул шут ĕçĕнче ĕçленĕ. Халĕ тивĕçлĕ канура.

Кукамайăн 6 ача. Вăл 3 ывăлпа 3 хĕр ура çине тăратнă. Манăн анне - чи кĕçĕнни. Вăл Анат Туçа ялĕнчи Эдуард Беззубовпа çемье çавăрнă.

Çулĕ çывăхах мар пулин те кукамай патĕнче час-часах хăнара пулатпăр. Пире вăл ăшă кăмăлпа кĕтсе илет, мăнукĕсене пылак çимĕçпе сăйлама васкать.

Çулленех каникул вăхăтĕнче кукамай патне кайма тăрăшатăп. Çулла унăн ĕçĕ питĕ нумай. Пахчара çум çумламалла, шăвармалла, чĕпсене пăхмалла. Вăл эпĕ килсен савăнсах каять.

 Кукамай 70 çул тултарчĕ. Эпĕ ăна юбилейпе хам алăпа ăсталанă парне кỹтĕм. Çав тери хĕпĕртерĕ.

 Кукамай пурри - савăнăç. Пĕрре те ĕçсĕр лармасть вăл. Мăнукĕсем валли алса-чăлха çыхать. Эпĕ юратса тăхăнатăп вĕсене. Асамлă пек туйăнаççĕ, шăнтмаççĕ.

А. БЕЗЗУБОВА