Районта чикĕ хуралçисен ветеранĕсен пĕрлĕхĕ Юхмапа Пăла тăрăхĕнчи пограничниксем пирки паха кĕнеке кăларнă хыççăнах ырă пуçарăва моряксем çийĕнчех ырларĕç.

Тинĕс-çар флотĕнче службăра пулнă ветерансен "Морское братство - союз моряков" обществăлла организацийĕ пĕлтĕр çак пархатарлă ĕçе пикенчĕ. Уйрăм хастарсен пуçарăвĕпе паянхи куна 349 ветеран пирки материалсем, сăн ỹкерчĕксем пухнă. Россельхозбанкăн ятарлă счечĕ çине расхутсене саплаштарма укçи-тенки те пуçтарăнса пырать. Анчах та çак тĕллевпе ку таранччен пурнăçланă ĕç çителĕксĕр. Июль уйăхĕнче паллă тăвакан Тинĕс-çар флочĕн кунĕ тĕлне кĕнекене пичетлесе кăларас тесен ветерансем пирки материалсем те, укçи-тенки те татах та кирлĕ пулать.

 Кирек мĕнле ĕçре те ырă пуçарăва хăпартланса йышăнни сайра. Ун пек чухне çынсем иккĕленсе тăраççĕ, васкамаççĕ тата ытти те. Акă, сăмахран хальхи вăхăтра районти 56 ялтан пĕр ветеран пирки те информаци паманнисем те пур. Вĕсем Пăлапуç Нурăс, Ыхра Çырми, Кзыл Чишма, Тикеш, Пăлакасси, Тутар Тимеш ялĕсем. Çавăн пекех Алманчă, Пăлапуç Пашьел, Ишлĕ, Чăваш Ишек, Пỹртлĕ, Сител, Анат Чакă, Кĕçĕн Арапуç, Хирти Пикшик, Шăхач, Тутар Сăкăт, Кĕçĕн Патăрьел, Çăл Атăк, Çĕньял, Кзыл Камыш, Ульяновка, Апрушнай ялĕсенчен те питĕ сахал информаци кĕнĕ. Ырă пуçарăва Упамса, Тăрăн, Треньел, Вăтаел, Каншел, Пăлаçи Атăк, Еншик ялĕсенче хапăлласа йышăнчĕç, ку тĕлĕшпе паян та хастар ĕçлесе пыраççĕ. Федор Белков, Григорий Мылов, Александр Нягин, Александр Ефремов ветерансен пуçарулăхне уйрăмах палăртса хăвармалла, моряксем пирки материалсем пухас тĕллевпе чылай тăрăшаççĕ.

Çак ĕçре, паллах, районти çар комиссариачĕ те пысăк пулăшу парать. Районти вĕрентỹ управленийĕ чылай материал кĕртет. Çапах та вырăнти администрацисенче пархатарлă пуçарăва уйрăм хастарсене явăçтарсан тата пысăк пулăшу пулĕччĕ.

Материалсене Патăрьелĕнчи "Велес" магазинти ветеринари аптекине (А. Нягин) тата Ленин урамĕнчи 80 çурта (В. Паймуллин) пырса пама пулать. Ыйтса пĕлмелли телефонсем: 8-908-306-93-13 тата 8-827-856-08-08.

Ю. ЯКОВЛЕВ, ll рангри запасри капитан