Мускавра пулнă

Мартăн 25-мĕшĕнче Чăваш Республикин Пуçлăхĕ Олег Николаев ĕçлĕ çул çỹревпе Мускавра пулнă, "ДОМ.РФ" АО генеральнăй директорĕпе Виталий Муткопа тĕл пулнă. Икĕ ен уçă калаçу вăхăтĕнче регионта çăмăллăх ипотекипе уйрăм граждансене валли хатĕрленĕ программăна пурнăçа кĕртессипе çыхăннă ыйтусене сỹтсе явнă.

ДОМ.РФ генеральнăй директорĕ хăйĕн сăмахĕнче Чăваш Республикин патшалăх корпорацийĕпе килĕшсе ĕçлени регионта çурт-йĕр хута ярас ĕçе вăй илтерме пулăшасса каланă.

 Виталий Мутко Чăваш Ен проектлă финанс ĕçне хастар кỹлĕннине каланă. ДОМ.РФ витĕмлĕхне шута илсе федераци пайĕнче шутланакан 110 гектара региона куçарса пама йышăну тунă, вĕсенчен 44,6 гектарне нумай ачаллă çемьесене тивĕçтернĕ.

Уçă калаçу вăхăтĕнче ЧР Пуçлăхĕ Олег Николаев ДОМ.РФ Фонда Шупашкара аталантарма палăртнă плана хатĕрлес ĕçе хутшăнма чĕнсе каланă. "Кунсăр пуçне Чăваш Патшалăх оперăпа балет театрне реконструкцилеме те витĕм кỹрсен вырăнлă пулĕччĕ", - тесе хушса каланă Чăваш Республикин Пуçлăхĕ. Çак проектсене валли вăтамран 70 млн тенкĕ кирлĕ, хушса укçан тỹлесси те планра пур.

Черетлĕ лару иртнĕ

Мартăн 24-мĕшĕнче Чăваш Республикин Министрсен Кабинечĕн черетлĕ ларăвĕ иртнĕ. ЧР Министрсен Кабинечĕн Председателĕн пĕрремĕш çумĕ - финанс министрĕ Михаил Ноздряков республикăн 2020 çулхи бюджетне пурнăçлани çинчен калакан саккун проекчĕ пирки тĕплĕн чарăнса тăнă. Унпа килĕшỹллĕн республика бюджечĕн пĕлтĕрхи тупăш пайĕ 70244 млн тенкĕпе танлашнă, çакă 2019 çултипе танлаштарсан 19,6 процент пысăкрах. Çав шутран республикăн хăйĕн тупăшĕ 31296,8 млн çитнĕ, ку вара маларахри çултан 2,2 процент пысăкрах. Республика хыснин тăкак пайĕ пĕлтĕр 69521,2 млн тенкĕне çитнĕ, çакă 2019 çулхинчен 26 процент пысăкрах.

Налук пухассипе хастар ĕçленĕ республикăра. Ку тĕлĕшпе Атăлçи федераци округне кĕрекен субъектсем хушшинче Чăваш Ен пиллĕкмĕш вырăна тухнă.

Медальсем халь виçĕ хут "хаклăрах"

Олимп вăййисене хутшăнса çитĕнỹ тăвакан ентешсене - спортсменсемпе вĕсен тренерĕсене - хавхалантармалли тỹлеве пысăклатма палăртнă. Малти виçĕ вырăншăн олимпиецсене халиччен пĕр миллион, 400 пин тата 300 пин тенкĕ тỹленĕ. Çак виçесене 2012 çултан улăштарман. Спорт министерстви медальсене "хаклатма" сĕннĕ

 Çапла вара ылтăншăн - 3 миллион, кĕмĕлшĕн - 1,2 миллион, пăхăршăн 900 пин тенкĕ тỹлĕç. Призерсен тренерĕсен премийĕсем те пысăкланаççĕ: 1,5 миллион, 600 пин тата 450 пин тенкĕ. Олимпиадăсене хутшăннăшăн паракан тỹлеве те хăпартаççĕ: спортсменсене - 150 пин, тренерсене 75 пин тенкĕ. Асăннă тỹлевсем Паралимп вăййисене хутшăнакан, унта çĕнтерекен ентешсене те пырса тивет.

Сăмах май, спорт министрĕ Василий Петров пĕлтернĕ тăрăх, Раççейĕн Токиори çитес олимпиадăна хутшăнакан пĕрлехи командине хальлĕхе пирĕн 8 ентеше кĕртнĕ. Паралимп вăййисенче Чăваш Енĕн тата 5 представителĕ вăй виçĕ.