Кăçал пĕрремĕш класа каякан ачасен ашшĕ-амăшĕнчен ачине шкула илме ыйтса çырнă заявленисене апрелĕн 1-мĕшĕнчен йышăнма пуçлаççĕ. Заявленисене йышăнас тапхăр июнь вĕçленичченех тăсăлать. Сентябрĕн 5-мĕшĕччен вара шкулсенче пĕрремĕш класа каякансен списокне çирĕплетеççĕ.
Ачана пĕрремĕш класа яма тĕрлĕ мелпе çырăнма май пур. Кун пирки Чăваш Ен Правительствин Председателĕн çумĕ - вĕренỹ министрĕ Алла Салаева эрнесерен иртекен планеркăра та каланă. Çапла ашшĕ-амăшĕ патшалăх услугисен порталĕпе усă курма пултарать. Тепĕр меслет - республикăн вĕренỹ услугисен порталĕ урлă. Виççĕмĕшĕ - заявление шкулта çырса памалла.
Малтанласа шутланă тăрăх, Чăваш Енри шкулсенче кăçал пĕрремĕш класа каякансем пурĕ 17 пине яхăн ача пулĕ.
А. ИВАНОВ
