ТЕРРОРИЗМПА экстремизм çĕршыври социаллă пурнăçпа политикăри лару-тăрăва усал енчен витĕм кỹрекен пулăмсем шутланаççĕ. Вĕсенчен асăрханасси, уйрăмах çамрăксене экстремистла юхăмсенчен хỹтĕлесси - тĕп тĕллев. Иртнĕ эрнере Комсомольски районĕнчи Урмаелĕнче шкулсенчи директорсен воспитани енĕпе тимлекен çумĕсемпе, социаллă педагогсемпе, вĕрентỹ учрежденийĕсенчи аслă вожатăйсемпе йĕркеленĕ семинарта шăпах çак ыйтусене çивĕчлетнĕ. Вăл "Вĕрентỹ учрежденийĕсенче тата çамрăксем хушшинче терроризма хирĕç профилактика тăвасси" ятпа иртнĕ. Унта пирĕн районти шкулсенчен те çак ĕçшĕн яваплă педагогсем хутшăннă.

Семинарта тутарсен Чăваш Республикинчи наципе культура автономийĕн представителĕ Хайдяр Сафиуллин, Чăваш Республикинчи терроризма хирĕç кĕрешекен аппарат ертỹçи Евгений Терешин, Чăваш Республикинчи çыхăну, информаци технологийĕ, массăллă коммуникацисен, шалти ĕçсен министерствин, республикăри вĕрентỹ тата çамрăксен политикин министерствин представителĕсем Алексей Чеботарев, Юрий Ястребов, Елена Янеева тата ыттисем тухса калаçнă, çĕршывра усал юхăм хăрушлăхĕ, унтан сыхă тăмаллине, терроризмпа, экстремизмпа çыхăннă çынсем саккунпа явап тытнине каланă.