ĔНЕР православи тĕннне ĕненекенсемшĕн Мăнкун умĕнхи аслă типĕ тапхăрĕн пиллĕкмĕш эрни пуçланчĕ. Вăл çичĕ эрнене тăсăлать. Çак тапхăрта çамрăксем те, ваттисем те шухăшпа е ĕçпе çылăха кĕнисемшĕн ỹкĕнсе чиркỹсене çỹреççĕ, çылăхĕсене каçарттарса чунĕсене тасатаççĕ, Турă юнне ăша илеççĕ. Çутă праçнике хатĕрленсе шалти усал шухăшсене çеç мар, кил-çурта та тасатаççĕ, тирпейлеççĕ. Аса илтеретпĕр, кăçал Христос чĕрĕлсе тăнине майăн 2-мĕшĕнче паллă тăваççĕ.

Паян вара мăсăльман тĕн-йăли йĕркине пăхăнса пурăнакансемшĕн те пысăк типĕ пуçланчĕ. Вĕсем те мĕн пур йăлана пăхăнса ирхине хĕвел тухиччен, каçхине хĕвел ансан çеç апатланаççĕ, Аслă Пỹлĕхрен ыррине ыйтса кунĕпех кĕл тăваççĕ, мĕскĕнсене, пурнăçра йывăр лару-тăрăва лекнисене алă тăсса пулăшаççĕ тата ытти те. Ураза-байрам уявне майăн 13-мĕшĕнче паллă тăваççĕ.