ПАТĂРЬЕЛĔНЧИ аслă çул çинче ирсерен автомашинăсем капланса ларнине, çавна май вĕсем питĕ ерипен çеç шунине иртен-çỹрен сăнанă-тăр. Уйрăмах эрнекунсенче, пасар кунĕнче, «пăкă» çухрăм ытла та тăсăлать-тăр. Пĕрремĕш вăтам шкул умĕнчи каçăма тирпейлесе тăракан светофор пулманран машинăсен ирĕксĕрех шкул ачисене пĕрин хыççăн теприне ирттерсе яма тивет. Паллах, çакнашкал каплану чылайăшне чăрмав кỹни те паллă. Анчах çакă çул-йĕр правилине пăсмаллине пĕлтермест. Тепĕр чухне чăтăмсăррисем йĕркене пăхăнмасăр хирĕçли йĕр çине автомашинăпа сиксе тухса нимĕн пулман пек малалла ыткăнаççĕ, авари тăвасран та сехĕрленмеççĕ.