Апрелĕн 13-мĕшĕнче Юхмапа Пăла тăрăхĕнче виçĕ министр ĕçлĕ çул çỹревпе пулнă. ЧР ĕçпе социаллă хỹтĕлев министрĕ Алена Елизарова, ЧР çут çанталăк ресурсĕсемпе экологи министрĕн тивĕçĕсене пурнăçлакан Александр Воробьев район администрацийĕн пуçлăхĕпе Рудольф Селивановпа тĕл пулса умри тĕллевсене çивĕчлетнĕ, ведомствăна пăхăнакан организацисен ĕçĕ-хĕлĕпе паллашнă.

Çавăн пекех кăнтăрла тĕлне Патăрьелне ЧР культура, национальность ĕçĕсен тата архив ĕçĕн министрĕ Светлана Каликова çитнĕ. Светлана Анатольевна район ертỹçипе тата культура сферин ĕçченĕсемпе тĕл пулса актуаллă ыйтусене çĕкленĕ. Пĕлтĕр районти клубсене юсама, пурлăхпа техника базине тĕреклетме, библиотекăсен фондне пуянлатма 44 миллион тенкĕ расхутланă. Кăçал Первомайскинчи культура çуртне реконструкцилеме, Нăрваш Шăхалĕнчине тĕпрен юсама 19 миллион тенкĕ пăхса хăварнă.

Культура ĕçченĕсен 2020 çулхи ĕçĕ-хĕлĕпе район администрацийĕн социаллă аталану тата туризм ыйтăвĕсемпе ĕçлекен пай начальникĕ Наталия Никитина паллаштарнă.

Светлана Каликовăпа Рудольф Селиванов «Çăкăр» историпе этнографи музейне çитсе унти çурт проблемисемпе паллашнă.

Çавăн пекех Патăрьелĕнчи искусство шкулĕнче пулнă. Унта Чăваш Енри алă ăстисен гильдийĕн выставкипе паллашнă. «Алă ăстисен ĕçĕсемпе хаваспах паллашатăп. Вĕсем ăсталăхне ачасене пама пултарнине ырлатăп. Патăрьел районĕнче чăннипех те тĕрлĕ наци халăхĕ культура эткерлĕхне упраса туслăн пĕр-пĕринпе ки- лĕштерсе пурăнаççĕ»,- тенĕ Светлана Анатольевна.

А. ИВАНОВА