Район çĕнĕ техникăпа пуянланса та пуянланса пынине палăртма кăмăллă. Çак кунсенче Нăрваш Шăхалĕнчи «Труд» ял хуçалăх предприятийĕ МТЗ-82 маркăллă трактор тата «ACROS 550» маркăллă комбайн илсе килнĕ. Хуçалăх пĕр вырăнта çеç тăманни, аталану çулĕпе малалла утни чăннипех та хавхалантарать.

Апрелĕн 13-мĕшĕнче Нăрваш Шăхаль ял тăрăхĕнчи техникăна патшалăх тĕрĕслевĕ кăларнă май комисси членĕсем- район администрацийĕн пуçлăхĕн çумĕ- ял хуçалăх, çĕр тата пурлăх хутшăнăвĕсен пай начальникĕ Виктор Львов тата çак пайри Ирина Хадарова специалист-эксперт, Патшалăх техника надзорĕн районти аслă инспекторĕ Илья Васильев, «Россельхозцентр» управленийĕн районсем хушшинчи Патăрьелĕнчи филиалĕн начальникĕ Олег Глухов- парка çитсе курчĕç, çĕнĕ «хурçă утпа» тата «уй-хир карапĕпе» паллашрĕç.

- Тин çеç туяннă трактора механизаторта нумай çул вăй хуракан Олег Егорова шантăмăр. Комбайнпа тыр-пул уйне 33 çул руль умĕнче ларакан Александр Васильев тухать. Техника паркне çĕнетсе пымаллах, унсăрăн кадр ыйтăвĕ те çивĕчленет. Çак кунсенче тата вăрлăха имçамлакан агрегат та килмелле. Кăçал вăрлăхпа ĕçленĕ çĕрте ĕçе йăлтах механизацилеме палăртнă, малашне михĕ йăтса та нушаланмалла пулмасть, - терĕ Айрат Закиров ертỹçĕ кĕскен «Труд» ял хуçалăх производство кооперативăн ĕç-хĕлĕпе паллаштарнă май.

Хуçалăхра акана валли вăрлăх хатĕр, çурхи тулă, урпа, пăрçа сутлăх та пур. Пурте пысăк пахалăхлă. Хăйсем те Ульяновскинчен сĕлĕ суперэлита 10 тонна туяннă. Минераллă удобренисем турттарса килсе хунă. Çунтармалли-сĕрмелли материал та çителĕклĕ. Сăмах май, районĕпе çунтармалли-сĕрмелли материалсем 510 тонна (кирлинчен 88 процент) пур.

Çак кун хуçалăхри тата ял тăрăхĕнчи тракторсене те тĕрĕслев витĕр кăларчĕç. Кашни «хурçă ута» тĕплĕн пăхрĕç. Хатĕррисен ретне лартнисенчен нумайăшĕ ĕçе тухма ирĕк илнине палăртрĕ Патшалăх техника надзорĕн аслă инспекторĕ Илья Васильев.

О. ПАВЛОВА