Шăнкăртамра Раççей тава тивĕçлĕ спорт мастерĕн, Европа чемпионĕн, ирĕклĕ майпа кĕрешсе тата «корэш» меслечĕпе Тĕнче кубокне тивĕçнĕ Минсеит Тазетдиновăн парнисене çĕнсе илессишĕн республика турнирĕ иртнĕ. Кăçалхипе вăл ХХХII хут пулнă.

Турнира Чăваш Ен спортсменĕсем çеç мар, Тутарстанран, Ульяновск, Чулхула облаçĕсен кĕрешỹçисем те явăçнă. Кавир çине 150 ытла каччăпа хĕр тухнă.

Спорт уявне уçнă çĕре район администрацийĕн пуçлăхĕ Рудольф Селиванов, Шăнкăртам ял тăрăхĕн пуçлăхĕ Минсур Валитов, Чăваш Республикин Патшалăх Канашĕн депутачĕ Сергей Семенов, Минсеит Тазетдинов хăй, район депутачĕсен Пухăвĕн депутачĕ, республикăри тата вырăнти «корэш» кĕрешỹ федерацийĕн председателĕ Ферит Чабатов тата ытти хăнасем те хутшăннă.

Район администрацийĕн пуçлăхĕ Рудольф Селиванов çамрăксене сывă пурнăç йĕркине тытса пыма хăнăхтарас тата патриотла воспитани парас ĕçре çакнашкал ăмăрту пысăк вырăн йышăннине палăртнă.

«Корэш» енĕпе 25-65 килограмлă виçе категорийĕсенче 8 ушкăн кĕрешнĕ. Вĕсенче З.Султеев, И.Яфизов. С.Асеинов, Б.Тумаков (Шăнкăртам), Ш.Вахитов (Ыхра Çырми), А.Сулейманов, И.Гилазов (Тутарстан) пĕрремĕш вырăнсене йышăннă.

Ирĕклĕ майпа кĕрешессипе 28-60 килограмлă тупăшусене 5 ушкăн явăçнă. Вĕсенче Д.Иванов (Канаш), Г.Чернов, И.Ятманов (Ульяновск облаçĕ), Е.Алексеев (Шупашкар), А.Цветков (Патăрьел) çĕнтерỹçĕсем пулнă.

А.ИВАНОВА.