«Раççей лидерĕсем» конкурс йыхравлать

Тăваттăмĕш хут йĕркелекен «Раççей лидерĕсем конкурса хутшăнма ЛидерыРоссии.рф сайтра апрелĕн 26-мĕшĕччен регистрациленме май пур. Унăн тĕллевĕ – управлени ĕçĕнче пултаруллисене тупса палăртасси. Çамрăк лидерсене тупăшăва хутшăнма Чăваш Ен Пуçлăхĕ Олег Николаев та чĕнсе каланă.

«Земство фельдшерĕ» программăна анлăлатнă

ЧР Министрсен Кабинечĕ «Земство фельдшерĕ» программăпа килĕшӳллĕн компенсаци тӳлевĕ памалли медицина ĕçченĕсен списокне анлăлатнă. Асăннă тӳлеве малашне фельдшер-акушер пункчĕсен акушерĕсемпе медицина сестрисене те парĕç. Аса илтерер: вăтам сыпăкри медиксене, яла ĕçлеме кайнăскерсене, паракан тӳлев 0,5 миллион тенкĕпе танлашать. Инçетри ял пулсан – 0,75 миллион тенкĕ. «Земство фельдшерĕ» программăна пурнăçлама тытăннăранпа Чăваш Енри ялсене ĕçлеме 81 фельдшер килнĕ. Вĕсен чи пысăк йышĕ Канаш, Шупашкар тата Патăрьел районĕсенче ĕçлет.

Субботник иртет

Апрелĕн 24-мĕшĕнче «Çурт-йĕр тата хула хутлăхĕ» наци проекчĕпе килĕшÿллĕн РФ Строительство министерстви Пĕтĕм Раççейри субботник ирттерме йышăннă. Çавăн пекех апрелĕн 15-30-мĕшĕсенче округ территорийĕсенче тавралăха тасатса йĕркене кĕртессипе уйăхлăх иртмелле. Коммуналлă службăсем, предприяти-организацисен ĕçченĕсем вăрăм хĕл хыççăн хула-ялсене çÿп-çапран тасатса тирпейлеме урамсене тухĕç. Чăваш Енре те субботника çулсерен хастар хутшăнаççĕ.