Районти агропромышленность комплексĕн ветеранĕсем çак кунсенче вырăна тухса канашлу ирттерчĕç. Вĕсем Туçари Валерий Салминăн çурт-музейĕнче пулчĕç, экспонатсемпе паллашрĕç. Çавăн пекех Туçари вăтам шкулти музее те çитсе курчĕç, пĕлỹ çуртĕнчех канашлу ирттерчĕç. Унта район администрацийĕн пуçлăхĕн çумĕ - экономика, ял хуçалăх, çĕр тата пурлăх хутшăнăвĕсен пайĕн начальникĕ Виктор Львов та хутшăнчĕ.

Мероприяти ырă пулăмран пуçланчĕ. Районти АПК ветеранĕсен канашĕн председателĕ Минегали Хафизов ял хуçалăхĕнче ĕçлесе тивĕçлĕ канăва кайнисен канашĕнче хальхи вăхăтра 30 çын пулнине каларĕ. Çак кун йыш тата пысăкланчĕ _ чылай çул Анат Туçари «Звезда» хуçалăха ертсе пынă Валерий Кузнецов ыйтса çырнине пурнăçласа пĕр саслăн пулса коллектива илчĕç.

АПК ветеранĕсем район пурнăçĕпе, çитĕнĕвĕсемпе кăсăклансах тăраççĕ. Вĕсене ял хуçалăх предприятийĕсенче е фермер хуçалăхĕсенче çĕнĕ объектсем уçнă çĕрте те, хирте те час-часах курма пулать. Канашсем параççĕ, çитменлĕхсене те кăтартаççĕ. Хăйсем те пурнăç таппипе тан утма тăрăшаççĕ. Коронавирус пандемийĕ пуçланнăранпа, шел пулин те, ветерансем питех тухса çỹреймерĕç. Кăçал февраль уйăхĕнче иртнĕ Юхмапа Пăла тăрăхĕн пĕлтĕрхи социаллă пурнăçĕпе экономика аталанăвне пĕтĕмлетекен канашлăва та, ытти ларусене те хутшăнаймарĕç. Район администрацийĕн пуçлăхĕн çумĕ - экономика, ял хуçалăх, çĕр тата пурлăх хутшăнăвĕсен пайĕн начальникĕ Виктор Львов çавна май вĕсене ял хуçалăхĕнчи 2020 çулхи кăтартусем тата кăçалхи тумалли ĕçсен планĕ пирки каласа пачĕ.

Аслă çултисем хăйсене хумхантаракан ыйтусене те хускатрĕç. Хура тăпраран тухăç илессине тата та ỹстерме май пуррине, кашни лаптăкпа туллин усă курмаллине, пушă тăракан витесене ĕçе кĕртмеллине тата ыттине те сỹтсе яврĕç. Çавăн пекех «Çăкăр» музейăн çĕнĕ çуртĕнче кашни колхоза халалланă стенд е кĕтес тусан питĕ аван пулнине палăртрĕç.

О. ПАВЛОВА