Коронавирус инфекцийĕнчен массăллă вакцинаци тăвас ĕç малалла пырать. Ăна икĕ тапхăрпа пурнăçлаççĕ. Малтанхи вакцинăна янă хыççăн иккĕмĕшне 21 кунтан тăваççĕ. Паянхи куна районта 1452 çын прививка тутарма ĕлкĕрнĕ. Вĕсенчен 850-шĕ иккĕмĕш вакцинăна та яртарнă. Çак йышра 230-шĕ - медицина ĕçченĕсем, 120-шĕ - социаллă службăра вăй хуракансем, 169-шĕ - вĕрентỹ сферинче тăрăшакансем, 933-шĕ - ытти категориллĕ граждансем.

 Çак кунсенче район администрацийĕн пуçлăхĕ Рудольф Селиванов коронавирус инфекцийĕнчен хамăр çĕршывра туса кăларнă «Спутник V” вакцина яртарнă.

«Коронавирус инфекцийĕ сарăласси пĕр шайра пырать пулин те çакă лăпланса лармаллине пĕлтермест-ха. Прививка тутармаллах тесе шутлатăп. Вирус çулне унсăрăн пỹлеймĕпĕр. Чире хăшĕсем йывăрпа ирттерсе яни сехĕрлентермеллех. Хамăра тата çывăх çыннăмăрсене хỹтĕлеме тăрăшмаллах пирĕн. Уйрăмах аслă çулхисемшĕн пăшăрханмалла. Самоизоляцин йывăр тапхăрне ирттертĕмĕр. Çакнашкалли тепре ан таврăнтăрах»-_ палăртнă Рудольф Васильевич.

Çак кун район администрацийĕн тата 14 ĕçченĕ вакцина яртарнă.

Аса илтеретпĕр: прививка тутарас текенсен килтен тухмасăрах патшалăх тивĕçтерĕвĕсен порталĕнчи харкам-хăй кабинечĕ урлă е участокри терапевтпа çыхăнса тата регистратурăна шăнкăравласа çырăнма пулать.

А. ИВАНОВА