Раççей Президенчĕ Владимир Путин апрелĕн 21-мĕшĕнче Мускаври «Манеж» тĕп курав центрĕнче РФ Федераци Пухăвне Çырупа тухрĕ. Сумлă мероприятие Федераци Канашĕн членĕсем, Патшалăх Думин депутачĕсем, Правительство членĕсем, Конституци тата Верховнăй суд ертỹçисем, регионсен ертỹçисем, Федераци субъекчĕсен саккун кăларакан пухусен председателĕ- сем, тĕн представителĕсем, общество деятелĕсем, массăллă информаци хатĕрĕсен ĕçченĕсем хутшăнчĕç.

Владимир Владимирович Çырура патшалăхăн аталану тĕп çул-йĕрне палăртрĕ, уйрăммăн пандеми тата сывлăх сыхлавĕ, демографи тата ачаллă çемьесене пулăшасси, ытти самантсем çинче чарăнса тăчĕ. Хăш-пĕр самантпа вулакан кĕскен паллаштаратпăр.

 Халăх йышĕ ỹссе пынин кăтартăвĕсене тавăрмалла тата 2030 çул тĕлне çынсен пурнăç тăршшĕне вăтамран 78 çула çитермелле.

Çуллахи лагерьсене ачине кантаракан ашшĕ-амăшне путевка хакĕн 50 процентне каялла тавăрса памалла.

 2021-2023 çулсенче яллă вырăнсене тепĕр 5 пин васкавлă пулăшу машини çитермелле.

 Тулли мар çемьесенче ỹсекен 8-16 çулсенчи ачасем валли тỹлев çирĕплетмелле - çĕршывĕпе вăтамран уйăхра 5650 тенкĕ. Шкул ачисем пур çемьесене тата кăçал пĕрремĕш класа каякан ача пур çемьесене кашни ачашăн 10 пин тенкĕ тỹлев памалла. Ача амăшĕ пулма хатĕрленекен хĕрарăмсене те уйăхсерен тỹлевпе тивĕçтерессине пăхса хумалла - вăтамран уйăхра 6350 тенкĕ.

Техникумсемпе колледжсенчи кураторсене те, класс ертỹçисене тỹленĕ пекех, уйăхра 5 пин тенкĕ тỹлевпе тивĕçтерме тытăнмалла. Çитес икĕ çулта çĕршыври аслă шкулсенче тата 45 пин бюджет вырăнĕ йĕркелемелле.

«Малалла та пĕрле пулса хамăр ума лартнă пур задачăна та пурнăçлатпăр», _ çак сăмахсемпе вĕçлерĕ хăйĕн Çырăвне Владимир Путин.

А. ИВАНОВ