Апрелĕн 20-мĕшĕнче район администрацийĕн пуçлăхĕ Рудольф Селиванов ял тăрăхĕсен пуçлăхĕсемпе канашлу ирттернĕ. Унта тĕпрен илсен ялсенче экологи субботникĕсем йĕркелес, тирпей-илемпе çыхăннă мероприятисене сăнаса тăма ĕç ушкăнĕ туса хурас, хăтлăх кĕртнине пĕтĕмлетме рейдсем ирттерес ыйтусем тавра сăмах пуçарнă.

Çак ыйтусемпе пухăннисем умĕнче район администрацийĕн пуçлăхĕн çумĕ – строительство, обществăлла инфратытăм аталанăвĕн пай начальникĕ Равиль Ямалетдинов тата çак пайри Кристина Тямина эколог, Патăрьел ял тăрăхĕн пуçлăхĕ Николай Ялуков умри тĕллевсене çивĕчлетнĕ.

Канашлурах районти экологи мероприятийĕсене тĕрĕслесе тăма комисси йĕркеленĕ. Унăн председателĕ _ районти депутатсен Пухăвĕн депутачĕ Наталия Андреева. Ҫавăн пекех çак йыша районти хула строительстви канашĕн членне Николай Селиванова, район администрацийĕн экологне Кристина Тяминăна, Нăрваш Шăхаль ял тăрăхĕн пуçлăхне Николай Раськина тата «Авангард» хаçатăн сотрудникне Альбина Егоровăна кĕртнĕ.

Ыран, апрелĕн 24 –мĕшĕнче, Пĕтĕм Раççейри субботник иртет. Ырă пуçаруран Юхмапа Пăла тăрăхĕнче пурăнакансем те айккинче юлмасса шансах тăратпăр. Сăмах май каласан, район центрĕнче пĕрремĕш субботник апрелĕн 9-мĕшĕнчех иртнĕ.

А. НИКОЛАЕВА