Тăван çĕршывăн Аслă вăрçин ахрăмĕ кунран-кун хыçала юлса пырать. Çавах вилĕме куçа-куçăн тăрса тунă Çĕнтерỹ манăçа тухмастех. Салтаксен паттăрлăхĕ, тылри хастарлăх мухтавлă.

Тăван çĕршывăн Аслă вăрçинче Çĕнтерỹ тунăранпа 76 çул тултарас умĕн районта

«Çĕнтерỹ Ялавĕ умĕнчи часовой» акци старт илчĕ. Унта кашни вăтам шкулах хутшăнать. Сăваплă ĕç Çĕнтерỹ кунĕнче - майăн 9-мĕшĕнче _ вĕçленет. Çĕнтерỹ Ялавĕ - совет халăхĕ, унăн хĕç-пăшаллă вăйĕсем фашистла Германие çапса аркатнине çирĕплетекен официаллă символ.

Апрелĕн 19-мĕшĕнче Çĕнтерỹ Ялавĕн копине Патăрьелĕнчи пĕрремĕш вăтам шкула илсе килчĕç. Сумлă мероприятие район администрацийĕн пуçлăхĕн пĕрремĕш çумĕ, финанс пайĕн начальникĕ Светлана Чернова, вĕрентỹ, çамрăксен политики, физкультурăпа спорт управленийĕн начальникĕ Ирина Рубцова, кадет класĕсен наставникĕсем Владимир Карягинпа Владимир Паймуллин хутшăнчĕç.

 Тăван çĕршывăн Аслă вăрçин гимнĕ - «Священная война» юрă янăраса кайнă май хисеплĕ хуралпа Ялава зала илсе кĕчĕç. Çитĕнекен ăру Çĕнтерỹ Ялавĕн историйĕпе паллашрĕ.

 «Çĕнтерỹ Ялавĕ умĕнчи часовой» акци çитĕнекен ăрăва çарпа патриотла воспитани парас, ирĕклĕхшĕн тата Тăван çĕршывăн никама пăхăнманлăхĕшĕн тăнă миллион çыннăн паттăрлăхне хисепе хурас тĕллевпе иртет. Вĕренекенсем çар вăхăтĕнчи историе аса илеççĕ, совет салтакĕсен паттăрлăхĕ умĕнче пуç таяççĕ. Акци Тăван çĕршывăн Аслă вăрçинче тунă Çĕнтерỹпе çыхăннă мероприятисене пуçăнма старт парать»,_-терĕ Светлана Алексеевна Çĕнтерỹ Ялавне шкула парса.

 Ăна йышăннă май вĕренекенсем шанăçа тỹрре кăларма пулчĕç.

Шкулта виçĕ кун Паттăрлăх урокĕсем пулаççĕ. Ялав умĕнче сăн ỹкерттереççĕ. Хуралта - «Зарница» тата «Орленок» вăййăн республикăри финалĕнче çĕнтернисем, кадет класĕсен воспитанникĕсем, шкулти çарпа патриотла клубăн, Юнармия членĕсем тăраççĕ.

Чи малтан караула «Патриот» çарпа патриотла клуб членĕсем тăчĕç.

А. ИВАНОВА