.Ачасен пурнăçĕ - тĕп вырăнта

 Республикăри вĕрентỹ учрежденийĕсенчи хăрушсăрлăх тытăмне тата çирĕпрех тĕрĕслемелле. Шкул е ача сачĕн лаптăкне кам кĕрсе тухать, мĕн тĕллевпе - йăлтах тишкерсе тăмалла. Çакăн пек тĕллев лартнă ЧР Пуçлăхĕ Олег Николаев. Олег Алексеевич Тутарстан Президенчĕ Рустам Минниханов ячĕпе хурлăхлă телеграмма янă. Синкерлĕ пулăмшăн пĕрле тарăннăн хурланнине пĕлтернĕ. Тутарстан Республикинче майăн 12-мĕшне Хурлăх кунĕ тесе пĕлтернĕ. Хусанти гимназире пăшалтан пеме тытăннăран 9 çын пурнăçĕ татăлнă. Вĕсенчен çиччĕшĕ - ачасем. Тата 30 яхăн çынна сыватмăша илсе çитернĕ

Çийĕнчех пурнăçламаллине асăрхаттарнă

Республика нацпроектпа пăхнă ĕçсене контрактацилес енĕпе юлса пыракан регионсен шутне кĕнĕ, çавна май Чăваш Ене Раççей Çут ĕç министерствин комиссийĕ килнĕ. Вăл регион асăннă енĕпе çине тăрса ĕçленине курса ĕненнĕ. ЧР вĕрентỹ министрĕ Алла Салаева "Вĕрентỹ" наци проекчĕпе уйăракан 187 миллион тенкĕрен 165 миллионĕ тĕлĕшпе конкурссем ирттересси çинчен пĕлтернине çирĕплетнĕ пулин те ЧР Пуçлăхĕ Олег Николаев нацпроектсемпе пăхнă ĕçсем тĕлĕшпе контрактсене вăхăтра тăвас ыйту час-часах çĕкленине кура ку енĕпе тимлĕ ĕçлемелли çинчен каланă.

Техника юсавлăхĕ пысăк пĕлтерĕшлĕ

Çĕнĕ йышши трактор-комбайн илме майсем ытларах пулччăр тесе аграрисене пулăшмалли мелсем те нумайлансах пыраççĕ. Чăваш Ен Пуçлăхĕн Олег Николаевăн хушăвĕпе ял хуçалăх техники туянакансене тăкаксен 40 процентне саплаштараççĕ. Унсăр пуçне пĕчĕк процентлă кредитсем те параççĕ. Патшалăх тĕревĕпе аграрисем те тухăçлă усă кураççĕ. Чăваш Енри ял хуçалăх предприятийĕсем çулталăк пуçланнăранпа 323 единица трактор-машина туяннă. Пĕлтĕрхипе танлаштарсан чылай ытларах.

Икĕ хутлă поезд çỹреме пуçланă

Шупашкар-Мускав маршрутпа икĕ хутлă поезд çỹреме пуçланă. Пурĕ вăл 726 вырăнлă, 14 вакунлă. Вакунсенче кондиционерсем вырнаçтарнă. Телефонсене, тĕрлĕ гаджетсене сетьпе çыхăнтармалли хатĕрсем те пур. Поездра кỹмепе куçса çỹрекенсем валли ятарлă вакунсем те йĕркеленĕ.

Вăхăтра тивĕçтернĕ

Май уйăхĕнче кану кунĕсем вăраха тăсăлчĕç пулин те ача укçипе, пенсипе те вăхăтра тивĕçтернĕ тесе пĕлтернĕ ЧР ĕçпе социаллă хỹтлĕх министрĕ Алена Елизарова. Укçана вăхăтра çитерес тесе банксемпе казначействăсен, финанс министерствипе социаллă хỹтлĕх пайĕсенче ĕçлекенсен майăн 4-мĕшĕнчен пуçласа 7-мĕшĕччен те ĕçе тухма тивнĕ. Енчен те кам та пулин ача укçине илеймен пулсан вĕсене 26-08-08 "хĕрỹ лини" телефонĕпе шăнкăравлама ыйтаççĕ.

35 пин тенкĕ çухатнă

 Шупашкарта пурăнакан 45 çулти хĕрарăм онлай мелпе билет туянас тесе укçине ултавçăсене куçарса панă. Кун пирки ШĔМ пĕлтерет. Хĕрарăм пĕр сайтра авиабилет туянас тенĕ те банк картти çинчен 35 пин тенкĕ çухалнă. Ку тĕлĕшпе уголовлă ĕç пуçарнă.