Тăлăхсене сертификат парĕç

ЧР Правительство çуртĕнче Патшалăх Канашĕн черетлĕ сессийĕ иртнĕ. Депутатсем пăхса тухса йышăннă саккун проекчĕсенчен пĕри тăлăх çамрăксене кил-çурт сертификачĕсемпе тивĕçтересси пулнă. Çурт-йĕр илме черетре тăракан тăлăх çамрăксем малашне кил-çурт сертификатне илме пултарĕç: 33 тăваткал метр лаптăклă хваттер туянмалăх. Ăна регионти çурт-йĕрĕн вăтам хакĕпе шутласа парĕç. Анчах та кунта та çирĕплетнĕ йĕрке пур. Çурт сертификатне пурнăçра хăйсен вырăнне тупнă, ĕçе вырнаçнă 23 çултан иртнĕ тăлăх çамрăксене парĕç.

720 проект ĕçе кĕртмелле

 Çынсем хăйсем пурăнакан вырăна хăтлăрах тăвас тесе укçа хывма хатĕр пулсан патшалăх та пысăк тĕрев парать. Вырăнти халăх пуçарăвне пурнăçа кĕртмелли программăпа килĕшỹллĕн республикăра кăçал

720 проект ĕçе кĕртмелле.

Халĕ шăпах строительство ĕçĕсене пурнăçлакан подрядчиксене палăртма аукционсем иртеççĕ. Халăх пуçарăвĕпе ялсенче пурăнакансем хастар усă кураççĕ. Тăватă çулта 1800 ытла проект ĕçе кĕртнĕ, пурĕ 1 миллиард та 300 миллион тенкĕлĕх. Соц сфера Повышение уровня жизни

Сасăлав майăн 30-мĕшĕччен пырать

Халăх йышлăн çỹрекен хăш вырăнсене çитес çул юсаса çĕнетессине республикăра пурăнакансем хăйсем палăртĕç. Ку тĕллевпе строительство министерстви интернет уçлăхĕнче сасăлав йĕркеленĕ. Вăл майăн 30-мĕшĕччен пырать. Сасăлав пĕтĕмлетĕвĕсем тăрăх çитес çул юсаса хăтлăх кĕртмелли лапамсене палăртĕç. Вĕсен проекчĕсемпе тĕплĕн ĕçлеме пуçлĕç. Сасăлав gorodsreda.ru сайтра пырать. Унта кашниех хăйĕн шухăшне палăртма пултарать.

Грант илес йĕрке çăмăлланĕ

Ял хуçалăхне тĕревлемелли грантсене памалли майсем анлăланаççĕ. Малашне çак укçана 30 пин çын таран пурăнакан ял агломерацийĕсене кĕрекен поселоксенчи АПК предприятийĕсем те илме пултарĕç. Çавăн пекех парăмсемпе çыхăннă чăрмав та пĕчĕкленет: хуçалăх е предприяти парăмĕ 10 пин тенкĕрен иртмест пулсан ку грант илме чăрмантармĕ. Тепĕр самант та пĕлтерĕшлĕ. Грант илнĕ май фермерăн çĕнĕ ĕç вырăнĕсем йĕркелемелле. Малашне çав ĕç вырăнĕсенчен пĕринче фермер хăй те шутланма пултарĕ.

Мотоблок - çын турттармалли хатĕр мар

Ялсенче пурăнакансем халĕ мотоблоксемпе ытларах усă кураççĕ. Çу кунĕсем çитнĕ май вара мотоблоксемпе çыхăннă аварисен шучĕ те ỹсет. Çутă хатĕрĕсĕр е ятарлă паллăсемсĕр трасса çине тухакансем пăтăрмахсене ытларах çакланаççĕ. Чăваш Енри техника тĕрĕслесе тăракан патшалăх инспекцийĕ мотоблокăн прицепĕ пулсан та аслă çул çине тухма тата çынсене турттарма юраманни çинчен хаттарать. Унпа ял хуçалăх ĕçĕсене пурнăçланă чухне çеç усă курмалла.

Гран-при - Максим Поповăн

Ставропольте Раççей шайĕнчи "Салтак конверчĕ" патриотла юрăсен фестиваль-конкурсĕ вĕçленнĕ. Унта çĕршывăн 16 регионĕнчи 26 юрăç тупăшнă. "Солистсем" номинацире Чăваш наци телерадиокомпанийĕнче тăрăшакан Максим Попов гран-прие тивĕçнĕ. Вăл хăй çырнă "Сăр чикки" ятлă юрра чуна пырса тивмелле шăрантарнă.