Шупашкарти "Атăл" стадион çĕнелĕ

Юлашки çулсенче спорт инфратытăмне аталантарас, спорт объекчĕсене çĕнетес тĕллевпе республикăра чылай ĕç туса ирттереççĕ. Шупашкарти «Атăл» стадиона юсаса çĕнетес ĕçе пуçланине халалласа чул хунă. Унта ЧР Пуçлăхĕ Олег Николаев, ЧР Патшалăх Думин депутачĕ Анатолий Аксаков, РФ Патшалăх Думин Национальноçсен ĕçĕсен комитечĕн председателĕ Валерий Газзаев, ЧР спорт министрĕ Василий Петров тата ыттисем хутшăннă.

Конкурса хутшăнар

Республикăра «Управлени команди» тата «Ҫамрăк лидерсен команди» конкурссем иртеççĕ. Пултарулăх тупăшăвне хутшăнас кăмăллисен кăçалхи июлĕн 9-мĕшĕччен электронлă регистраци майĕпе заявка памалла. Конкурс сайчĕ: lider.cap.ru. Унта ытти пĕтĕм ыйтăва уçăмлатма пулать.

Тухăçа чакараççĕ

Раççей ял хуçалăх центрĕн Чăваш Енри филиалĕн специалисчĕсем акнă хирсенче фитосанитари тĕпчевĕ ирттернĕ, лаптăксене сиенлĕ хурт-кăпшанкă тапăннине палăртнă.Çанталăк типĕ, ăшă тăнă май акнă уй-хирте вĕт пăрçа, трипс, нăрă /пьявица/ сарăлни сисĕнет. Вĕт пăрçа малтан кĕрхи пучахлă культурăсене тапăнать. Унтан шăтса тухнă çурхи культурăсен анине куçать. Специалистсем республикăри 10 пин гектар çинчи культурăсене тĕрĕсленĕ хыççăн 5 пин гектар çинче вĕт пăрçа сарăлнине асăрханă. Вăл ытларах кĕрхи культурăсен лаптăкĕнче пулнине палăртнă, 1 тăваткал метрта — 10-25 экземпляр. Май уйăхĕнчи шăрăх çанталăка пула сăтăрçăсем хăвăрт сарăлса пыни сисĕннĕ. Кĕрхи культурăсем вăй илнĕçемĕн вĕт пăрçа вĕсене ытлашши сиенлеймест. Анчах юнашарти çурхи тырă культурисене, нумай çул ӳсекен пучахлă курăксене самай сăтăр кӳме пултарать. Кун пек ӳсен-тăран япăх çитĕнет, сарăхса типет. Пĕр тăваткал метрта 30-40 нăрă курăнсан ӳсен-тăрана сыхлассипе мероприятисем ирттермелле.

Ҫамрăксен форумĕ

Чăвашпотребсоюзăн «Салют» ача-пăча сывлăха çирĕплетекен лагерьте ЧР потребитель кооперацийĕсенче ĕçлекен çамрăксен форумĕ 8-мĕш хут иртнĕ. Унта республикăри кооператив предприятийĕсемпе организацийĕсенчи çамрăк специалистсем хутшăннă. Кăçал ăна Раççей потребкооперацийĕ 190 çул тултарнине халалланă. Форума пуçтарăннисене Чăвашпотребсоюзăн председателĕ, Патшалăх Канашĕн депутачĕ Валерий Павлов, РФ Патшалăх Думин депутачĕ Леонид Черкесов тата ыттисем саламланă. Конкурсра çĕнтернĕ пултаруллă çамрăксене дипломсем парса чысланă. Яш-кĕрĕм ăсталăх класĕсене, тĕрлĕ конкурссене хутшăннă, пĕр-пĕрин опычĕпе паллашнă.