Çĕртмен 1-мĕшĕнче "Пĕрлĕхлĕ Раççей" парти çу уйăхĕн 24-30-мĕшĕсенче йĕркеленĕ малтанхи сасăлава пĕтĕмлетнĕ. Унта хутшăннă республика çыннисен шучĕ рекорд шайĕнче пулнă - 181 пин те 27 çын. Çĕнтерỹçĕсене халăх сасăласа палăртнă.

Малтанхи сасăлавăн тĕллевĕ мĕнре-ха? Суйлава хутшăнакан кандидатсен списокне хатĕрличчен "Пĕрлĕхлĕ Раççей" парти республикăра пурăнакансемпе канашлать, çынсем кама ытларах шанаççĕ? Чи нумай сасă пухнисене парти суйлава хутшăнма ирĕк парать. Аса илтеретпĕр, авăн уйăхĕн 19-мĕшĕнче Чăваш Енре ЧР Патшалăх Канашĕн тата РФ Патшалăх Думин депутачĕсен суйлавĕсем иртĕç.

Кăçал иртнĕ малтанхи сасăлавăн хăйне евĕрлĕхĕсем пур. Уйрăмах палăраканни - çынсем электрон майпа сасăлалани. Малтанласа шиклентерчĕ пулин те, çапах ку меслете суйлавçăсем çăмăллăнах йышăнчĕç. Çакна сасăлакансен шучĕ рекордла пысăк пулни те кăтартать. Чăнах та, килтен тухмасăрах сасăлама питĕ меллĕ- çке. Кунсăр пуçне цифра технологийĕсем сасăлава уççăнлăх кĕртрĕç.

Чăваш Ен çыннисен суйламалăх йыш пулнă: малтанхи сасăлава хутшăнма 220 кандидат регистрациленнĕ. Çĕршывра вăтамран регионта пурăнакансен 10 проценчĕ сасăланă пулсан, Чăваш Енре çак хисеп икĕ хута яхăн нумайрах. Е сасăлава республикăри кашни пиллĕкмĕш çын хутшăннă.Çакă 2016 çулхи кăтартусенчен пысăкрах.

 Иртнĕ сасăлавăн тĕп сăмахĕсем - çĕнелни, конкуренци, тĕрĕслĕх - Чăваш Енри сасăлава тĕрĕс хак параççĕ. Регистрациленнĕ кандидатсен йышĕнче республикăн Патшалăх Канашĕнче ĕçленисем тата халь ĕçлекеннисем питĕ сахаллăн. "Пысăк политикăра" çĕнĕ çын нумай. Тĕслĕхрен, парти списокĕпе Патшалăх Думине каякан виçĕ çын йышне ЧР Министрсен Кабинечĕн Председателĕн заместителĕ - ял хуçалăх министрĕ Сергей Артамонов кĕнĕ, Патшалăх Думин пĕр мандатлă округĕсенче ЧР Министрсен Кабинечĕн Председателĕн заместителĕ - вĕренỹ министрĕ Алла Салаева (Шупашкар округĕ) тата Леонид Пронин предприниматель (Канаш округĕ) çĕнтернĕ.

Кĕрешỹ чăннипех те çивĕч пулнă. ЧР Патшалăх Канашĕн кашни округĕнче вăтамран 7 кандидат регистрациленнĕ, РФ Патшалăх Думин икĕ округĕнче - 17 тата 19. Парти списокне лекессишĕн 31 çын тупăшнă.

 Малтанхи сасăлавра партин республика списокĕнче "Пĕрлĕхлĕ Раççей" партин Чăваш регион уйрăмĕн секретарĕ Алена Аршинова çĕнтернĕ. Вăл 128 пин ытла сасă пухнă. Уншăн сасăлава хутшăннисен 71 процентне яхăнăшĕ хăйĕн сассине панă.

Алена АРШИНОВА, "Пĕрлĕхлĕ Раççей" партин Чăваш регион уйрăмĕн секретарĕ:

- Кăçал малтанхи сасăлав электрон мелпе иртрĕ. Çакă кашни суйлавçа килтен тухмасăрах сасăлама май пачĕ. Çавăн пекех сасăлава пĕтĕмлетнĕ хыççăн кашниех хăйĕн сассине тĕрĕс шута илнине тĕрĕслеме пултарчĕ. Сасăлав питĕ уççăн иртрĕ. Пирĕн парти май килнĕ таран ытларах çынна сасăлава хутшăнтарассишĕн, кашнине хăйсен шухăшне калама майсем туса парассишĕн тăрăшать. Парти Чăваш Ен çыннисем малтанхи сасăлавра суйланă кандидатсене ЧР Патшалăх Канашĕн тата РФ Патшалăх Думин суйлавĕсене хутшăнма ирĕк парать. Чи лайăххисене, чи тивĕçлисене палăртма пулăшнăшăн пурне те пысăк тав.

Патăрьел суйлав округĕнче (Патăрьел, Шăмăршă районĕсем тата Комсомольски районĕн пĕр пайĕ) Олег Мешковпа Валерий Антонов малтанхи суйлавăн çĕнтерỹçисем пулса тăнă.

Олег Вадимович МЕШКОВ, малтанхи сасăлавăн çĕнтерỹçи:

- "Пĕрлĕхлĕ Раççей" партин малтанхи сасăлавне питĕ нумай çын хутшăнчĕ. Пирĕн округра 10 пин ытла çын суйларĕ. Вĕсенчен кашни иккĕмĕшĕ манăн кадидатурăшăн хăйĕн сассине пачĕ. Ку маншăн питĕ пысăк чыс. ЧР Патшалăх Канашне икĕ суйлава суйланнă май манăн ĕç опычĕ пухăннă. Çак ĕçе малалла тăсасса шанатăп. Тавах сире мана пулăшнăшăн.

Валерий Михайлович АНТОНОВ, малтанхи сасăлавăн çĕнтерỹçи:

- Хаклă ентешсем! "Пĕрлĕхлĕ Раççей" партин малтанхи сасăлавĕнче мана пулăшнăшăн сире тав тăвасшăн. Кандидатсен конкурентлă кĕрешĕвĕнче эсир мана шаннине кăтартса патăр. Эпĕ - Каншел ялĕнчен. Çавăнпа районăн ыйтăвĕсене лайăх пĕлетĕп. Чи малтанах эпĕ кашни кил хуçалăхĕ патнех шыв пăрăхне илсе çитересшĕн.