Юлашки çулсенче республика территоринче сиенлĕ пултăран сарăлма пуçларĕ. Вăрри нумайран питĕ хăвăрт ĕрчет, тăватă метр çỹл- лĕш ỹсет. 5 градус сивве те чăтаять. Çулçин сĕткенĕнче наркăмăшлă япала - фуранокумарин - пур. Вăл ỹте лексен пĕçертсе ярать, сиенленни 1-2 кунран тин палăрать. Суран 4-5 кунтан хăмăрланать, кайран типсе тĕксĕм йĕр хăварать.

Сосновский пултăранĕнчен наркăмăшланакансем те пур. Кун пек чухне нерв тытăмĕ, чĕре тĕртĕмĕсем япăх ĕçлеме тытăнаççĕ. Сĕткенĕ куçа лексен суккăр та тăратса хăварать. Аллергипе аптăракансемшĕн те хăрушă. Вăрман пек кашласа ларакан, тарăн тымар яракан ỹсен-тăран Чăваш Енре 300 гектара яхăн йышăнать, пирĕн районта ăна 35 гектар (Алманчă, Первомайски, Çĕньял, Турхан, Пикшик, Çĕнĕ Ахпỹрт, Кзыл Чишма, Туçа, Шăнкăртам, Тăрăн, Патăрьел ял тăрăхĕсенче ỹсет) тупса палăртнă.

- Пултăрана пĕтерес тĕллевпе республикăри ял хуçалăх министерстви "Чăваш Республикин территорийĕнче Сосновский пултăранĕпе кĕрешесси" тĕллевлĕ программа хатĕрленĕ. Унпа килĕшỹллĕн пултăрана пĕтерме республика хыснинчен кăçал 8,9 млн тенкĕ, 2022 тата 2023 çулсенче 6,7 млн тенкĕшер уйăрма палăртнă. Укçана районсене янă. Хальхи вăхăтра муниципалитет шайĕнче ĕçсем пыраççĕ. Кĕске вăхăтра ятарлă бригадăсем йĕркелемелле, вĕсене кирлĕ хатĕрсемпе, хỹтĕлев костюмĕсемпе тата химикатсемпе тивĕçтермелле те ĕçе пуçăнмалла, - тенĕ ЧР Министрсен Кабинечĕн Председателĕн çумĕ - ял хуçалăх министрĕ Сергей Артамонов майăн 31-мĕшĕнче ирттернĕ канашлура. Пултăрана механизм, хими тата агротехника мелĕсемпе пĕтерме май пур. Хими мелĕ шутне ỹсен-тăрана гербицидпа сапни (Раундап Торнадо, Ураган, Пилараунд тата ытти те) кĕрет. Механизмпа усă курас тесен тымарне кăкламалла, çулмалла, унтан пухса илмелле. Агротехникăна пурнăçа кĕртес пулсан лаптăка тарăн сухаламалла та нумай çул ỹсекен ỹсен-тăран акмалла.

Хăш меле суйлса илесси пултăран ăçта тата мĕн çỹллĕш çитĕннинчен, çавăн пекех Россельхозцентр специалисчĕн рекомендацийĕнчен килет.

О. ПАВЛОВА