ПАТĂРЬЕЛ районĕ хăнасене яланах тарават. Çак кунсенче çеç район администрацийĕн пуçлăхĕ Рудольф Селиванов çамрăк делегаципе - М. В. Ломоносов ячĕллĕ Мускаври патшалăх университечĕн географи факультечĕн студенчĕсемпе - тĕл пулнине "Авангард" хаçатра пĕлтернĕччĕ. Çамрăксем Юхмапа Пăла тăрăхĕнчи ялсем мĕнле аталаннипе, демографи лару-тăрăвĕпе тата ытти ыйтупа та кăсăкланса Патăрьел, Туçа, Шăнкăртам, Первомайски, Ишлĕ ял тăрăхĕсене çитнĕ, пĕрлех халăхăн культурипе, йăли-йĕркипе те паллашнă.

Çĕршывăн тĕп хулинчи аслă шкулта вĕренекен студентсем Патăрьел районĕ республикăри ытти районсенчен чылай енĕпе - ĕçченлĕхĕпе, халăхăн пурнăçне хăтлăлатассипе, çынсем капмар та хăтлă çуртсем тăвассипе, нумай нациллĕ халăх килĕштерсе пурăннипе тата ыттипе те уйрăлса тăнине, малашне хăйсен диплом ĕçĕсем валли пуян материал пухнине палăртнă.