ÇАК КУНСЕНЧЕ Хусанти ипподромра юртă лашасен элита-дерби ăмăртăвĕ иртнĕ. Унта Раççейре чи вăйлă чупакан урхамахсем старта тăнă. Пысăк тупăшăва Юхмапа Пăла тăрăхĕнчи спортсменсем те хутшăннă çеç мар, инçе çултан çĕнтерỹпе таврăннă. Ырă калаçу пĕр тăван Валерий тата Алексей Красновсем пирки пырать. Иртнĕ çул Мускавра элита-дерби çĕнтерỹçи пулнă Валерий Алексеевич тытса пыракан Зов Предков РМ урхамах хальхинче те хуçана пысăк савăнăç парнеленĕ, финиша 1 минут та 59.3 çеккунтра кĕрсе пĕрремĕш вырăн çĕнсе илнĕ, дерби призне тивĕçнĕ. Çĕршыв шайĕнчи çĕнтерỹ паттăрĕ, пирĕн ентешĕмĕр юлашки çулсенче çак урхамахпа çитĕнỹ хыççăн çитĕнỹ тăвать. Патăрьелĕнчи "Паттăр" ФСК директорĕ, Чăваш Республикин физкультурăпа спортăн тава тивĕçлĕ ĕçченĕ, Раççей Федерацийĕн физкультурăпа спорт отличникĕ, лаша спорчĕн пысăк хастарĕ Алексей Егорович Краснов çак ăмăртура виççĕмĕш вырăн тухнă.