Саккăрмĕш теçеткене ваклакан икĕ арçын калаçăвне илтме тỹр килчĕ. "Сывлăх пур чухне ĕçе утатăп-ха. Тỹлев тивĕçтерет. Килте мĕн туса ларас? Çын хушшинче хама лайăх туятăп. Ĕçпе чылай яла çитетĕп. Хыпарсене вăхăтра пĕлетĕп", - терĕ лара-тăра пĕлменскер. "Выльăх-чĕрлĕх (сăвăнакан ĕне те пур) тытатпăр. Пахчара хамăра мĕн кирлине çитĕнтеретпĕр. Лавккаран сĕт-çу, пахча-çимĕç туянса укçа тăккаласси çук. Ачасем пулăшаççĕ. Мăнуксене ĕçе явăçтаратăп. Ĕç чапа кăларать, юлхав пăсать теççĕ-çке",- хутшăнать калаçăва тепри. Вăхăтĕнче вĕсем иккĕшĕ те яваплă вырăнсенче ĕçленĕ. Хăш-пĕр çамрăк ĕçе утасшăн пулманнишĕн пăшăрханаççĕ. Çакна районта тухса тăракан "Авангард" хаçат страницисенче ĕçе чĕнекен пĕлтерỹсем пуррипе, хăшĕсем темиçешер хутчен те пичетленнипе çирĕплетеççĕ. Çамрăксене тỹлевĕ интереслентерет-ха ĕнтĕ. Вĕсен хваттер туянмалла е çуртлă-йĕрлĕ пулмалла, ача-пăча çуратса ỹстермелле тата ытти те. Çанă тавăрса ĕçлекенсем ку енĕпе пур ыйтăва та татаççĕ. Енчен те, акă, Чăваш Республикинче кашни çын пуçне уйăхсерен пурăнмалли виçе 11653 тенкĕпе (ĕçлекен çынсене 12702, ачасене 11303, пенсионерсене 10022 тенкĕ кирлĕ теççĕ) танлашать пулсан, "Авангард" пĕрлешĕвĕн "Патăрьел беконĕ" филиалĕнче уйăхсерен вăтамран 35862 тенкĕ ĕçлесе илеççĕ. 36 çын вăй хурать унта. "Батыревский" акционерсен хупă пĕрлешĕвĕнче кăçалхи çур çулхи уйăхсерен илнĕ тỹлев кашни çын пуçне 29309 тенкĕпе танлашнă. Е тата Ф.Чабатов хресчен фермер хуçалăхĕнче вăй хуракансем кашни уйăхра 29778 тенкĕ, А.Лялькин фермер патĕнче ĕçлекенсем - 22524, Л.Краснова фермер хуçалăхне утакансем 20365 тенкĕ ĕçлесе илнĕ. Раççейĕпе ĕç укçин чи пĕчĕк виçи (МРОТ) саккунпа килĕшỹллĕн кăçалхи январь уйăхĕнчен пуçласа 12792 тенкĕпе танлашать пулсан, районти нихăш ял хуçалăх предприятийĕнче те, хресчен фермер хуçалăхĕнче те унран сахал илекенни çук.

 А. АСТРАХАНЦЕВА