Пасар экономики тапхăрĕнче хăш-пĕр коллективлă ял хуçалăх предприятийĕсем хавшарĕç. Теприсем вара тăрăшуллă ĕçе пула çĕр ĕçĕнче тата выльăх-чĕрлĕх тытса пысăк çитĕнỹсем туса пычĕç. Тухăçлă культурăсем çитĕнтерсе, ăратлă ĕне выльăх усраса хуçалăх экономикине тĕреклетрĕç. Çавна май ял халăхне ĕçпе тивĕçтерме, çĕнĕ техника туянма, вăрлăхсене çĕнетме пултарчĕç. Сăмаха "Исток" çĕр ĕç фирми пирки малалла тăсасшăн. Паянхи куна пур енлĕ аталаннă тĕреклĕ хуçалăх шутланать вăл. Специалистсем вырăнта пулни куç кĕретех кунта. Вĕсенчен пĕри - Л. Воробьева (сан ỹкерчĕкре) тĕп бухгалтер-экономист. Шкултан вĕренсе тухнă хыççăн Людмила Владимировна Шупашкарти экономикăпа технологи техникумне бухгалтера вĕренме кайнă. Диплом илсен çамрăк специалист Патăрьелĕнчи çăкăр заводне ĕçе вырнаçнă. 2005 çултан çĕр ĕç фирмине экономист пулса куçнă. Унăн пултарулăхне çийĕнчех асăрханă. Л. Воробьевăна тĕп бухгалтер пулма шаннă. Çемьеллĕ Людмила Владимировна. Владимир Петровичпа вĕсем икĕ хĕрпе пĕр ывăл çитĕн- тернĕ. Аслисем мăшăрлă. 4 мăнук çитĕнет Воробьевсен. Людмила Владимировнăпа Владимир Петрович 35 çул пĕрле килĕштерсе пурăнаççĕ. Телейлĕ тесе шутлать хăйне хĕрарăм. Савнă мăшăрĕ çумра. Ачисемпе ăрăва малалла тăсакансем çурта тултараççĕ. Кунта ытла мĕн кирлĕ тата? Ашшĕ-амăшĕ ир вилнĕ Людмилăн. Пĕртăван виçĕ хĕре Л.Кошкина пăхса ỹстернĕ. Çакăншăн çĕре çити пуç таяççĕ Лидия Ивановна умĕнче. Пурнăçа юратмашкăн пурте пур Л.Воробьевăн. Маларах ял хуçалăх управленийĕн, район администрацийĕн, республикăри, унтан Раççей Федерацийĕнчи ял хуçалăх министерствисен Тав тата Хисеп хучĕсене тивĕçнĕ вăл. Иртнĕ çул тата кăçал "Районти чи лайăх экономист-бухгалтер" сумлă ята çĕнсе илме пултарнă. Пĕрле ĕçлекен юлташĕсем хисеплеççĕ. Çак çитĕнỹсенче Людмила Владимировна вĕсен пулăшăвне, ăнланулăхне курать. Тăрăшуллă ĕç кирек кама та чапа кăларать. Çав шутра "Исток" çĕр ĕç фирминче ĕçлекенсене те. Ĕç укçине аван илеççĕ вĕсем. Туса илнĕ ял хуçалăх продукцийĕпе фирмăра вăй хуракансене те тивĕçтереççĕ.

А. ИВАНОВА