РАЙОНТА коронавирусран хỹтĕленес тĕллевпе прививка тутаракансем хушшинче утмăл çултан аслăрах çынсем те чылай. Кун пирки районти халăха социаллă хỹтлĕх паракан центр работникĕсем тăтăшах ватăсемпе тĕл пулса калаçаççĕ. Акă мĕн пĕлтерчĕ хаçат редакцине центр ертỹçи Анисия Воробьева: - Паянхи кун районта 60 çултан аслăрах 8853 çын пурăнать. Вĕсенчен пирĕн сотрудниксем 4426 ватă патне çитсе прививка пирки информаци панă, ыйтăм ирттернĕ. Тĕл пулса калаçнисенчен 850-шĕ вакцина тутарма хатĕр пулнине пĕлтернĕ. Сăмах май каласан, Анат Туçари В. Маршев, Тăрăнти С. Алексеевапа А. Илехметов çак кунсенче çеç чире хирĕç кĕрешсе укол тутарнă. Социаллă хỹтлĕх центрĕн автомашинипе ку таранччен 25 ватăна сиплев учрежденийĕсене прививка тутарма илсе кайнă. Вĕсем пурте хăйсене лайăх туяççĕ.