Маларахри вăхăтра авиаци аталанăвĕнче парашют уйрăм вырăн йышăннă. Вăл талантлă авиаконструкторсене пĕрремĕш класлă çар самолечĕсем ăсталама витĕм кỹнĕ. Летчик-испытательсенчен нумайăшĕ хăйсен пурнăçне парашюта пула çăлса хăварнă. Çĕршывăн паллă летчикĕ, Совет Союзĕн Геройĕ М.Громов çĕнĕ самолета тĕрĕсленĕ вăхăтра 300 метр çỹллĕшĕнчен парашютпа çĕр çине чиперех анса ларнă. Чи малтанхи парашют хăçан пулнă-ха? 1495 çулта Леонардо да Винчи "вĕçекен машина" е пулас парашютăн чертежне ỹкерсе хатĕрленĕ. 1930 çулта малтанласа сывлăш десантне парашютпа усă курса антарнă. Çакă Воронеж хули çывăхĕнче августăн 2-мĕшĕнче пулнă. "Пирĕнсĕр пуçне никам та мар!". Çак сăмахсене легендарлă ВДВ генералĕ В.Маргелов каланă. Сывлăш çар десантникĕсем Тăван çĕршывăн Аслă вăрçин вут-çулăмлă çулĕсене хутшăннă, Афганистанра, Чечен Республикинче тата ытти хĕрỹ точкăсенчи çар операцийĕсенче палăрнă. Десантниксем чăтăмлăхпа, хăюлăхпа, çирĕплĕхпе, нихăçан та пуç усманнипе, пуçарулăхпа уйрăлса тăраççĕ. Çитĕнекен ăрăва çарпа патриотла воспитани парас тĕлĕшпе те ырă тĕслĕх кăтартаççĕ.

В. ПЕТРОВ, Тăрăн ялĕ, ВДВ ветеранĕ