Июлěн 30-мěшěнче Чăваш Республикин Экономикăн аслă канашěн черетлě ларăвě иртнě. Ăна Чăваш Ен Пуçлăхě Олег Николаев ертсе пынă. Хальхинче ларăва Патăрьел тата Елчěк районěсен аталанăвěсене халалланă.  Патăрьел район  администрацийěн пуçлăхě Рудольф Селиванов Юхмапа Пăла тăрăхěн социаллă экономика аталанăвěпе паллаштарнă, малашне мěнле проектсем пурнăçа кěртме тěллевленине каласа панă.

Патăрьелсем  ял хуçалăх продукцине тирпейлесе сутас енěпе республикăра та кăтартуллă. Аш-какая та, сěт-çу юр-варне те тирпейлекен цехсем сахал мар кунта. Çěнě кооперативсем уçма та хатěрленеççě: «Молочные зори» тата «Батыр». Çывăх çулсенче Ыхра Çырми ял тăрăхěнче агропромышленность паркě хута каймалла. Вăл 1 миллиард тенке яхăн инвестици илěртме, çěнě ěç вырăнěсем йěркелеме май парě. Кунта хамăр районти аграрисем çеç мар, кÿршěсем те хăйсен юр-варне турттарма, тирпейлемелли цехсем уçма пултарěç.

А. Иванов