"ИСТОК" çĕр ĕç фирми (ертỹçи Александр Илюткин) Юхмапа Пăла тăрăхĕнче тухăçлă аталанса пыракан хуçалăхсенчен пĕри. Кунта кашни ĕçе тĕп специалистсем кирлĕ пек йĕркелесе, тирпейлесе пыраççĕ. Сăмах май каласан, çĕр ĕç фирминче çамрăксене яваплă ĕçе илентерме пултарни те, тỹлевĕ тивĕçтерни те пысăк пĕлтерĕшлĕ. Хальхи вăхăтра кунта выльăх-чĕрлĕх тухтăрĕнче тăрăшакан Татьяна Лубашкина Чăваш патшалăх аграри университетĕнчен вĕренсе тухнă хыççăн килнĕ. Маларах Германири фермер хуçалăхĕнче стажировкăра та пулнă, унта 8 уйăх тăрăшса "Чи лайăх практикант" ята тивĕçнĕ. 23 çулти Улатăр район хĕрĕ хальхи вăхăтра Кĕçĕн Патăрьелĕнче хăйĕн специальноçĕпе кăмăлтан ĕçлет, çамрăк пулсан та пуринпе те пĕр чĕлхе тупма тăрăшать. Сăмах май каласан, Дарья Яковлева зоотехник-селекционер, Женя Думилин ветеринари тухтăрĕ те çамрăк специалистсем. Вĕсем те аслă шкул хыççăн çак хуçалăхра хăйсен специальноçĕпе ĕçлесе опыта пуянлатаççĕ.