Шел пулин те коронавируспа чирлекенсен шучĕ çĕршывра, вăл шутра Юхмапа Пăла тăрăхĕнче те чакмасть-ха. Паянхи кун вара хăрушă амакран пĕр чăрмавсăр вакцинациленме пулать, çакăн валли пур услови те çителĕклĕ. Пурте пĕр вăхăтра ушкăнпа прививка тусан çеç коллективлă иммунитет çирĕпленĕ. Унăн шайĕ палăртнă тăрăх 60 процентран кая пулмалла мар. Ку кăтарту хальлĕхе районта 47 процентпа танлашать. Çак ĕçе палăртнă шая çитерес тесен общество шухăшне халăх патне çитерекенсен - ял тăрăхĕсен пуçлăхĕсен, тĕрлĕ шайри депутатсен тата ыттисен те пĕрле хутшăнса тумалли ĕçсем самаях. Чи кирли - вакцинаци пирки çынсем патне тĕрĕс информаци çитересси тата халăха пăтраштаракан шухăшсене уçăмлатасси. Чăваш Енре, çавăн пекех пирĕн районта халĕ ревакцинаци те пуçланчĕ. Январь тата февраль уйăхĕсенче прививка тутарнă пациентсем тепĕр хут укол тутараççĕ. Кăмăл пуррисем унчченхи пекех Патшалăх пулăшăвĕсен порталĕ, электронлă регистратура урлă, 122 телефон номерĕсемпе шăнкăравласа çырăнмалла. Çавăн пекех тухтăр та черете тăратма пултарать. Хальхи вăхăтра вакцинăсем çителĕклĕ. Вăл шутра "Спутник Лайт" вакцинăн 30 дозине те района кỹрсе килнĕ. Унпа вара пĕр хутчен çеç укол тумалла.

 А. ИЛЬИН