ПАТĂРЬЕЛĔНЧИ масарта канлĕх тупнă тăванăмăрсене асра тыса лартнă хĕрессемпе картисене кивелсе пынăçемĕн çынсем тирпейлеççĕ, çĕнетеççĕ. Масар айккинче пуçтарса пыракан тимĕр картасем сапаланса, тирпейсĕрленсе те выртмаççĕ. Ял тăрăх администрацийĕ йĕркеленипе пĕр яваплă çын вĕсене вăхăтран-вăхăта тимĕр-тăмăр пуçтаракан базăна кайса леçет. Укçи-тенкипе вара масара хăтлăх, тирпей-илем кĕртнĕ çĕрех усă кураççĕ. Çак кунсенче те вĕсем субботник хыççăнхи тимĕр картасемпе кивелнĕ пăрăхсене тиесе кайма килнĕ. Масар çумĕнче вара тап-таса та çап-çутă пулнă. Вĕсене пĕлсе тăрсах Крепков урамĕнче пурăнакан пĕр арçын килнĕ те йăлтах тиесе кайнă. Патăрьел ял тăрăхĕн пуçлăхĕ Н. Ялуков пĕлтернĕ тăрăх сăтăрçăн йĕрĕ çине çийĕнчех ỹкнĕ. Айăпа кĕнĕ çын тимĕр-тăмăр сутнă укçине тавăрса панă.