Чир алăкран кĕрет те тĕнĕ шăтăкĕнчен тухать, теççĕ. Çакă тĕрĕсех ĕнтĕ. Çавăнпа çын сывлăхне тĕрĕслеме диспансеризаци ирттереççĕ. Хăшĕн-пĕрин чирне унта маларахах тупса палăртаççĕ. Сиплеве пикенеççĕ. Вăхăтран-вăхăта врач патĕнче пулни хамăршăнах усăллă. Çакна 38 çул медицина сферинче ĕçленĕрен те çирĕплетме пултаратăп. Туçа больницин физиотерапи кабинечĕн медицина сестри пулнă эпĕ. В.Никитина - тĕп враччĕ. М.Федоровапа, Г.Зайцевапа, Г.Заплаткинапа, М. Платоновапа, М.Андреевапа пĕрле ĕçлеттĕмĕр. Медицина ĕçченĕсем тĕп ĕçпе çеç çырлахман. Эрнере пĕр кун кăнтăрларан килсенчи санитари тирпейлĕхне тĕрĕслеме каяттăмăр. 20-шер кил çирĕплетнĕччĕ. Тепĕр эрнинче вара обществăлла çурт-йĕрсенче (пекарьня, столовăй, лавкка, шкул...) пулаттăмăр. Субботниксенчен те пăрăнман. Колхоз выльăхĕсем валли утă хатĕрлеме, çĕрулми касма тата суйлама та кайнă. Пĕр ĕçре те çынран иртсе те кайман, кая та юлман. Паянхи кун та сывлăхлă пулнишĕн хĕпĕртетĕп. Мăшăрпа пĕрле 50 çул пурăннине паллă турăмăр. 3 ача çитĕнтерсе пурнăç çулĕ çине кăлартăмăр. Халĕ вĕсем пурте çемьеллĕ. 7 мăнукпа 2 кĕçĕн мăнук ỹсет. Кил хушшинчи ĕçсене хамăрах пурнăçлатпăр. Чăх-чĕп усратпăр. Качака пур. Пахчара мĕн кирли пурте çитĕнет. Ывăлсемпе кинсем, хĕрпе кĕрỹ çын хушшинчи ĕçсенче вăй хураççĕ. Мĕншĕн палăртрăм-ха çакна. Коронавирусран пурте прививка тутартăмăр. Çавăнпа. Укола пурте йĕркеллех ирттертĕмĕр. Юн пусăмĕ хăпарасси, ỹт температури ỹсесси пулмарĕ. Кăшăлвирус чирĕ çурта килсе ан кĕтĕрех. Пирĕн пата килсе çỹреме мăнуксене те шанчăклă пултăр. Халиччен кĕрлĕ-çурлă грипран та прививка тутарассинчен пăрăнман. Медицина ĕçĕн ветеранĕ пулнăран вакцина яртарни чиртен хỹтĕленине çирĕплететĕпех. Патшалăх аслă çулхи çынсен сывлăхĕшĕн тăрăшатех. Пирĕн те çавна вырăна хурасчĕ.

Е. САЛМИНА. Кивĕ Ахпỹрт ялĕ.