Район администрацийĕн пуçлăхĕ Рудольф Селиванов ял тăрăхĕсен пуçлăхĕсемпе, район администрацийĕн структура подразделенийĕсен ертỹçисемпе ирттернĕ канашлура çак шухăша пĕрре мар çивĕчлетрĕ. Вырăнти хăй тытăмлăх органĕсен тĕп тĕллевĕсем - ялсене хăтлăх кĕртесси, урамсемпе тăкăрлăксене тирпейлесси, çулсене çĕнетесси тата ытти те. Çаксене пурнăçа кĕртме вара тĕрлĕ шайри программăсене хутшăнни те чылай пулăшать. Канашлура кун йĕркине кĕртнĕ пĕрремĕш ыйту шăпах ку тĕлĕшпе районта чи кăтартуллисене палăртакан конкурс пĕтĕмлетĕвне тишкерни пулчĕ. Унăн итогĕпе район администрацийĕн пуçлăхĕн пĕрремĕш çумĕ - строительство тата обществăлла инфратытăм аталану пай пуçлăхĕ Равиль Ямалетдинов паллаштарчĕ. Тавралăха хăтлăх кỹрес, йывăç-тĕм лартса симĕслетес тĕлĕшпе йĕркеленĕ конкурс условийĕпе килĕшỹллĕн комисси "Чи лайăххи" ята пилĕк номинаципе хак панă: "Чи хăтлă ял", "Чи кăтартуллă урам", "Чи кăтартуллă хушма хуçалăх", "Организацин чи хăтлă территорийĕ", "Пурте усă куракан чи кăтартуллă объект". Çакна та палăртса хăвармалла. "Чи хăтлă ял" номинацие районти пĕр ял тăрăхĕ те хутшăнман. "Чи кăтартуллă урам" ята конкурса тăратнă виçĕ поселенинчен (Тутар Сăкăтри Лесная тата Шăнкăртамри Киров урамĕ) Аслă Чементи Туптов урамĕ çĕнсе илнĕ. Кунта пурăнакансем пысăк тăкаксемсĕрех урама тирпейлĕ те кăтартуллă тытса тăраççĕ. Конкурсăн "Чи кăтартуллă хушма хуçалăх" номинацине те 19 ял тăрăхĕнчен ултă çемье (Патăрьел, Тутар Сăкăт, Нăрваш Шăхаль, Аслă Чемен, Пикшик, Кĕçĕн Патăрьел ял тăрăхĕсем) çеç хутшăннă пирки район администрацийĕн пуçлăхĕ Рудольф Селиванов ял тăрăхĕсен пуçлăхĕсен умĕнче уйрăмах ыйтăва çивĕчлетрĕ. "Тирпейлĕ те хăтлă пурăнакансем, çут çанталăка юратакансем, тавралăхшăн тăрăшакансем кашни ялтах пур. Вĕсене курма, асăрхама, хавхалантарма çеç пĕлмелле",- терĕ вăл. Конкурс итогĕпе Кĕçĕн Патăрьелĕнчи Н. Рубцов хуçалăхĕ пĕрремĕш вырăн йышăннă. "Организацин чи хăтлă территорийĕ" ята çĕнсе илессишĕн Патăрьелĕнчи "Версаль" кафе тата Тăрăнти "Исток" çĕр ĕç фирми хутшăннă. "Пурте усă куракан чи кăтартуллă объект" номинацие тăратнă тăватă заявкăран (Сăкăт, Нăрваш Шăхаль, Тăрăн ял тăрăхĕсем те хутшăннă) Шăнкăртамри "Халăхсен туслăхĕн" паркĕ хисеплĕ ята çĕнсе илнĕ.
- Район шайĕнче йĕркелекен конкурса хутшăнакансене укçан хавхалантараççĕ. Ăна вĕсем ял-сăн сăпатне çĕнетме, урама илем кĕртме усă кураççĕ. Çавăнпа та кăçал конкурса хутшăнман 11 ял поселенийĕ вырăнта ку тĕлĕшпе кирлĕ пек ĕçлеменнине, çынсене хавхалантарманнине çирĕплетсе парать,-терĕ конкурс пĕлтерĕшне çивĕчлетсе район администрацийĕн пуçлăхĕн çумĕ Р. Ямалетдинов.
Çавăн пекех канашлура газ кĕртес ыйтăва та сỹтсе яврĕç. 2021 çулхи июнĕн 11-мĕшĕнче "Раççей Федерацийĕнче газпа тивĕçтересси çинчен" федераци саккуне улшăнусем кĕртесси çинчен" 184-мĕш номерлĕ федераци саккунĕ вăя кĕнĕ. Унпа килĕшỹллĕн çурта халиччен газпа хутса ăшăтайман граждансен участокĕсем патне газ пăрăхĕсене тỹлевсĕр тăсмалла. Ку тĕлĕшпе каллех ял тăрăхĕсен пуçлăхĕсен пысăк хастарлăх кăтартма тивĕ, вĕсен çак кунсенчех халиччен "кăвак çулăмпа" усă курман çемьесен списокне туса хатĕрлемелле. Равиль Ямалетдинов пĕлтерĕшлĕ мероприятие йĕркелесе пыма республикăра, çавăн пекех районта та штаб туса хунипе (район администрацийĕн пуçлăхĕ Рудольф Селиванов - штаб ертỹçи) паллаштарчĕ, ял тăрăхĕсен пуçлăхĕсен ыйтăвĕсене хуравларĕ.
Канашлура районта туса пĕтермен капиталлă строительство объекчĕсене регистрацилес, сентябрĕн 19-мĕшĕнчи суйлав умĕнхи кампанинче суйлав участокĕсенче саккунпа килĕшỹллĕн пурнăçламалли ыйтусене те пăхса тухрĕç.
А. ЕГОРОВА
