Район хирĕсем майĕпен пушанса пыраççĕ. "Батыревский", "Красное Знамя" ял хуçалăх предприятийĕсенче, М. Лаврентьева фермер хуçалăхĕнче - пурĕ 29 ял хуçалăх организацийĕпе фермер хуçалăхĕнче - тыр-пула пухса кĕртнĕ. Августăн 9-мĕшĕ тĕлне пĕрчĕллĕ тата пăрçа йышши культурăсене 13995 гектар (мĕн пур лаптăкăн 77,3 проценчĕ) çапса тĕшĕленĕ. Йĕтеме 31139 тонна тырă кĕнĕ. Вăтам тухăç пĕр гектартан 22,3 центнерпа танлашнă. Кĕрхи культурăсене акма 3505 гектар çĕр хатĕрленĕ. Шăнкăртамри Н. Шрша хуçалăхĕнче çĕр улми кăларма пикеннĕ. Сăмах май, кăçал районта "иккĕмĕш çăкăр" 623 гектар йышăнать.