Патăрьелĕнчи "Паттăр" стадионта тата физкультурăпа спорт комплексĕнче Пĕтĕм Раççейри баскетболла тата мини футболла выляс енĕпе йĕркеленĕ фестивалĕн муниципаллă тапхăрне хутшăнса Юхмапа Пăла тăрăхĕнчи çамрăк спортсменсем (ỹкĕрчĕкре унăн саманчĕ) ăмăртрĕç. Фестивале хутшăнакансене район администрацийĕн пуçлăхĕ Рудольф Селиванов, "Чăвашгосснаб" тулли мар яваплă пĕрлешỹ директорĕ, хамăрăн ентешĕмĕр Владимир Антонов, "Паттăр" физкультурăпа спорт комплексĕн директорĕ Алексей Краснов саламларĕç, пурне те çирĕп сывлăх, ырă малашлăх сунчĕç.

- Юхмапа Пăла тăрăхĕнче ку таранччен спорта аталантарма, ачасемпе çамрăксен сывлăхне тĕреклетме чылай ĕç тунă. Ку ыйтупа малалла та тимлетпĕр. Çывăх кунсенчех, Физкультурник кунĕнче, ГТО нормисене пурнăçлакансем валли ятарлă лапам уçма хатĕрленетпĕр. Çавăн пекех Треньелĕнче уçă çĕрте футбол уйĕпе пĕрле физкультурăпа сывлăх комплексĕ тума палăртрăмăр. Спорт - сывлăх, илемлĕх, пысăк хавхалану, çирĕп ăс-тăн. Ăнăçу сунатăп сире пурне те,- терĕ район администрацийĕн пуçлăхĕ Рудольф Селиванов фестивале хапăл тунă çамрăксене ырă сунса.

Фестивале хутшăннă командăсем стадионта мини футболла, спорт комплексĕнче баскетболла вылярĕç, ишес енĕпе ăмăртрĕç.

А. НИКОЛАЕВА