Августăн 7-мĕшĕ районта тепĕр паллă пулăмпа асра тăрса юлĕ. Улатăрпа Пăрачкав епархийĕн Владыки, Феодор епископ хутшăннипе Алманчă ял тăрăхĕн территорийĕнчи вăрманта преподобный Серафим Саровский скитĕнче Серафим Саровский преподобный ячĕпе хисепленекен храм уçăлнă, пĕрремĕш служба иртнĕ. Кĕлĕ ирттерме çавăн пекех Улатăрпа Пăрачкав епархийĕн виççĕмĕш округĕн благочиннăйĕ, Туçари çветтуй Троица ячĕллĕ чиркỹ настоятелĕ Николай Марков протоиерей тата хамăр тăрăхри ытти священниксем те килнĕ. Уявра район администрацийĕн пуçлăхĕ Рудольф Селиванов, Алманчă ял тăрăхĕн пуçлăхĕ Владимир Киргизов, "Чăвашгосснаб" пĕрлешỹ директорĕ Валерий Антонов, ял тăрăхĕн депутачĕсем, предприяти-организаци ертỹçисем, ял çыннисем те пулнă. Район администрацийĕн пуçлăхĕ Рудольф Селиванов халăхра килĕшỹпе ăнланулăх хуçалансан çеç ырă улшăнусем пулнине палăртнă. Çĕнĕ храмсем уçăлни патриотлăха аталантарма, çынсене ырă ĕçсем тума хавхалантарнине каланă.

(Хамăр корр.).