РАЙОН центрĕнче çеç мар, Юхмапа Пăла тăрăхĕнчи ытти ялсенче те хуçалăхри хытă каяша (йывăç турачĕсене, строительство материалĕсене, пахча çимĕç каяшĕсене унта тултарма юрамасть!) çỹп-çап контейнерне пуçтарса пырасси йăлана кĕчĕ темелле. Патăрьелĕнче те вĕсем кашни урампа тăкăрлăкрах пур. Пĕрре çеç те мар, икшер вырнаçтарнă. Анчах та çакнашкал ырă ĕçе халăх хăнăхса пынă вăхăтрах усал туса ура хурас текенсем те тупăнаççĕ. Акă, çак кунсенче çеç район центрĕнчи Ленин урамĕнчи пластмас контейнер çунса кайнă, юрăхсăра тухнă. Унта пĕр пуçтах чикарккине сỹнтермесĕрех ывăтса хăварнă-тăр. Теприсен вара алă тупанĕ питĕ кĕçĕтнĕ пулас. Вĕсем Красноармейская урамра ларакан икĕ контейнера та кутăн çавăрса хунă. Хăйсен ăссăрла хăтланăвĕпе кама тĕлĕнтерес е хăратас тенĕ-ши çакскерсем! Пĕрисен ырă ĕçне мĕншĕн теприсен вараламалла, усал тумалла?