Прививка тутарнăшăн - 100 пин тенкĕ

Пирĕн çĕршывра пурăнакансене коронавирусран привика тутарнăшăн укçа тỹлеме йышăннă. Йышăнăва Раççей премьер-министрĕ Михаил Мишустин алă пуснă. Анчах пурне те мар, пурĕ 1000 çынна. Вĕсен 18 çултан аслăрах пулмалла. Телейлисем 100-шер пин тенке тивĕçĕç. Вĕсене компьютер суйласа илĕ. Çĕнтерỹçĕсене сентябрĕн 1-мĕшĕнчен тытăнса декабрĕн 1-мĕшĕччен палăртĕç. Укçана "Мир" банк картти çине куçарса парĕç.

Ыр кăмăллăх акцийĕ

Сентябрĕн 1-мĕшĕнче, Пĕлỹ кунĕнче, Чăваш Енри шкулсемпе ача сачĕсенче Пĕтĕм Раççейри "Ачасем чечек вырăнне" ыр кăмăллăх акцийĕ пиллĕкмĕш хут иртĕ. Акцие Аня Чижова ячĕллĕ ыр кăмăллăх фончĕ йĕркелет. Унăн тĕллевĕ - темиçе кунран шанса каякан чечек çыххи çине нумай укçа тăкаклас вырăнне юратнă учителе пĕр чечек çыххи парнелесси тата перекетленĕ укçана ыр кăмăллăха уйăрасси. 2017 çултанпа Чăваш Енре тă-ватă акци ирттернĕ. Çак вăхăтра 1700000 тенкĕ пуçтарнă, 108 ачана пулăшу кỹнĕ.

Компенсаци тỹлеççĕ

Республикăра сыснасен Африка чумипе кĕрешес ĕç пырать. Ерекен чире Муркаш районĕнче тупса палăртнă. Çывăхри территорисене, 14 яла тĕрĕслеве илнĕ, хăрушлăх зони тесе палăртса карантин йышăннă. Кунти хуçалăхсенчен тата халăхран сыснасене илсе кайса тĕп тума, çынсене вара уншăн укçа тỹлеме йышăну тунă пулнă. Çак ĕçе ветеринарсем пурнăçланă.

Спортсменка премисене тивĕçнĕ

 Токиора иртнĕ Олимп вăййисенче Мускав тата Чăваш Ен чысне хỹтĕленĕ Анжелика Сидорова шăчăпа сиксе кĕмĕл медаль çĕнсе илсе регион тата федераци тỹлевĕсене тивĕçнĕ. 30 çулти спортсменкăна Раççей Правительстви 2,5 млн тенкĕ преми парĕ, çавăн чухлех Мускав уйăрĕ. Чăваш Ен 1,2 млн тенкĕ уйăрĕ.

Аса илтеретпĕр: РФ Президенчĕ Владимир Путин Анжелика Сидоровăна I степень "Тăван çĕршыв умĕнчи тава тивĕçлĕ ĕçсемшĕн" орден медалĕпе чыслама йышăннă.

Медицина туризмĕ аталанать

Республикăра "Сывлăх сыхлавĕ" наци проекчĕн тытăмне кĕрекен "Медицинăри пулăшу ĕçĕсен экспортне аталантарасси" регион проекчĕ пурнăçланать. Чăваш Енри куç микрохирургине, травматологи центрне сипленме таçтан та килеççĕ. Çавăн пекех юлашки çулсенче шăл юсаттарма та килекен нумай.

Çурчĕ те илемлĕ пултăр

 "Культура" наци проекчĕпе килĕшỹллĕн кăçал пирĕн республикăна 226,5 млн тенкĕ укçа уйăрнă. Муркаш районĕнчи Ярапайкассинче культура çурчĕ çĕклеççĕ, Тăвай ялĕпе Патăрьел районĕнчи Нăрваш Шăхаль клубне, Шупашкарти, Çĕнĕ Шупашкарти, Сĕнтĕрвăрринчи, Шупашкар районĕнчи 6 ỹнер шкулне юсаççĕ тата ытти те. Культура сох-е культуры

Виртуаллă курав

 Кăçал Шупашкар "Ĕç паттăрлăхĕн хули" ята тивĕçрĕ. Çавна май республикăн тĕп хулинче тĕрлĕ мероприяти иртет. Шупашкарти Н.В. Никольский ячĕллĕ професси колледжĕ те айккинче юлман. Ковид чирĕ сарăлас хăрушлăха шута илсе колледжра "Шупашкар - ĕç паттăрлăхĕн хули" виртуаллă курав йĕркеленĕ. Унта Шупашкара эвакуаципе куçса килнĕ тата Çĕнтерĕве çывхартма тăрăшнă ытти предприяти çинчен каласа кăтартнă, сăн ỹкерчĕксем вырнаçтарнă.