Сире те сĕнетĕп Коронавирус мĕн пур тĕнчешĕн чăтăмлă тĕрĕслев пулса тăчĕ. Китайри Ухань хулинче ăна 2019 çулхи декабрь уйăхĕнче тупнăччĕ. 2020 çулхи март уйăхĕнче вара Пĕтĕм тĕнчери Сывлăх Сыхлавĕн организацийĕ пандеми çинчен пĕлтерчĕ. Чăваш Енре паянхи куна çак чир 39 пин ытла çынра палăрчĕ. 2 пин ытларахăшĕ пурнăçран уйрăлчĕç. Çак йышра пирĕн çывăх çыннăмăрсем те пулчĕç. Вĕсемпе сыв пуллашма йывăр пулчĕ.

Патшалăх çынсен сывлăхне упрас тĕлĕшпе сахал мар тăрăшать. Уявсемпе çыхăннă канмалли кунсене вăрăмлатать. Аслă çулхисене ытларах килте ларма ыйтать. Прививка тутарма сĕнет. Вакцина яртарни чир-чĕртен хỹтĕленме пулăшнине палăртать. Хамăр пурнăçа хамăр малалла тăсма тăрăшмалла ĕнтĕ. Çакна шута илсе эпĕ те прививка тутартăм. Малтан сывлăха тĕрĕслеттертĕм. Флюорографи тухрăм. Терапевт чĕрене итлесе пăхрĕ. Температурăна виçрĕç. Юн пусăмĕпе интересленчĕç. Икĕ-виçĕ кун хама мĕнлерех тытмаллине ăнлантарчĕç. Веçех йĕркеллĕ иртрĕ. Халăхра çỹрекен сас-хура пĕртте çирĕпленмерĕ.

Çавăнпа пурне те прививка тутарма сĕнетĕп. Халиччен вакцина янипе çынсем вилнине илтменччĕ-ха. Прививка тутарманнисем чирлеççĕ тата йывăррăн сывалаççĕ тесе çирĕплетет медицина.

 Çын хушшинче пурăнать кирек кам та. Почта хаçат-журнал илме те, коммуналлă çăмăллăхсемшĕн татăлма та, лавккана апат-çимĕç туянма та çỹретпĕр. Пасара тухасси те пулатех. Ачасем, мăнуксем килсе çỹреççĕ. Чир ересрен хỹтлĕх çук. Этемлĕхе прививка тутарни çеç çак хăрушлăхран çăлса хăварма пултарать. Пĕр шикленмесĕрех вакцина яртарма тăрăшăр. Çакă хăвăршăн та, çывăх çыннăрсемшĕн те сыхлăх пулĕ.

А. САЛМИН, "Авангард" хаçатăн ветеранĕ.