РАЙОНТИ обществăлла организацисенчен пĕри - тавра пĕлỹçĕсен пĕрлĕхĕ. Ăна районти право хуралĕнче чылай çул ĕçленĕ Дмитрий Коннов ертсе пырать. Дмитрий Николаевич хаçат редакцине пĕлтернĕ тăрăх паянхи кун вĕсен ушкăнĕнче 30 ытла хастар тăрăшать. Вĕсенчен Çĕньялти Мария Мадюкова, Патăрьелĕнчи Николай Ларионов, Ыхра Çырминчи Светлана Кулакова тата ыттисем те творчество каçалăкĕнче алă усса çеç лармаççĕ, тăтăшах çĕнĕ кĕнекесем кăлараççĕ, çивĕч статьясем, сăвăсем хайлаççĕ. Тавра пĕлỹçĕсем хушшинче тивĕçлĕ канăва тухнă ветеран-педагогсем те пур. Акă, Алманчăри Вячеслав Волков (çак кунсенче 60 çул тултарать) вăтăр çул ялти шкулта ĕçленĕ, хăй пурăнакан çурт çумĕнче музей уçма мехел çитернĕ Тури Туçари Валерий Салмин педагог-ветеранăн, хисеплĕ краеведăн творчество пуçламăшĕ те шкулпах çыхăннă.