Ноябрĕн 14-мĕшĕнче Пĕтĕм Раççейри халăх çыравĕн пĕрремĕш тапхăрĕ - çынсенчен ыйтса кăтартусем пуçтарасси - вĕçленчĕ. Ку ĕçе 50 миллион ытла кил хуçалăхĕнче туса ирттернĕ. Халĕ иккĕмĕш тапхăр пуçланать - кăтартусене пĕтĕмлетсе тĕпчесси.

Цифра технологийĕ тата çынсем çав тапхăрта хăйсене хăш енчен кăтартрĕç? Раççей мĕнле кăтартусемпе палăрĕ? Пĕтĕмлетỹсем хăçан паллă пулĕç?

Ун пирки тата çыравăн хăш-пĕр саманчĕсемпе ноябрĕн 15-мĕшĕнче Калининградра иртнĕ "Çырав - пĕрремĕш тапхăр пĕтĕмлетĕвĕсем" пресс-конференцире Раççей статистикин, Раççей Федерацийĕн Правительствин ертỹçисем, çырав партнерĕсем каласа панă.

Раççей статистикин ертỹçи Павел Малков халăх çыравĕн тĕп тапхăрĕ социаллă пурнăçпа экономикăри, политикăри, эпидемиологи тĕлĕшĕнчи çăмăл мар условисенче иртнине аса илтернĕ. Чир-чĕр сарăлнине пула ăна темиçе хут куçарма та тивнĕ, апла пулин те пĕрех çырава йĕркеленĕ.

"Пуçтарнă кăтартусене пĕтĕмлетсенех эпир çырава хутшăнма май пулнă мелсемпе миçе çын усă курнине калама пултаратпăр: çыравçăсем миçе кил-хуçалăхне çитсе çынсенчен ыйтса пĕлнине, Патшалăх пулăшăвĕсен пĕрлехи порталĕнче тата ятарлă участоксенче миçе çын çырăннине", - тесе палăртнă П. Малков.

Цифра мелĕсемпе даннăйсене пуçтарнине тата тĕпченине пула çĕршывра миçе çын пурăннине Раççей статистики килес çулхи январьте пичетлеме палăртать, пĕтĕмĕшле кăтартусем 2022 çул вĕçлениччен хатĕр пулаççĕ.

Пĕтĕмĕшле илсен çырав йĕркеллĕ иртнĕ. Патшалăх пулăшăвĕсен пĕрлехи порталĕ аван ĕçленĕ. Ун урлă 25 миллион çын - 10 миллион кил хуçалăх - çырăннă. Хамăр çĕршывра туса кăларнă шанчăклă программăсем вырнаçтарнă планшетсем те аван ĕçленĕ. Çыравçăсен тăрăшулăхне те палăртнă пресс-конференцире.

"2030 çулхи çырав пачах урăхла иртĕ, ытларах патшалăх информаци тытăмĕсем урлă даннăйсене пуçтарса пĕтĕмлетĕç, çыравçăсене ку ĕçе сайра явăçтарĕç. Тĕп тĕллев - халăх пурнăçне çăмăллатасси тата пĕр информациех темиçе ведомствăна çитерессине пăрахăçласси", - тенĕ ЦСР президенчĕ Владислав Онищенко.

Пĕтĕм Раççейри халăх çыравĕн медиаофисĕ.