Иккĕмĕш вулавпа йышăннă

Чăваш Республикин Патшалăх Канашĕн черетлĕ тăваттăмĕш сессийĕнче депутатсем вунна яхăн саккун проектне тишкернĕ. Сессин пĕрремĕш тапхăрĕнчи пекех - хальхинче те кун йĕркинче республикăн 2022 çулхи тата планпа пăхнă 2023, 2024 çулсенчи бюджечĕн проекчĕ тĕп вырăнта пулнă. Парламент ăна иккĕмĕш вулавпа йышăннă. Проект тĕлĕшпе ПК спикерĕ Леонид Черкесов çитес çулхи бюджет тупăшĕ кăçалхи малтан çирĕплетнĕ виçинчен 8,9 процент пысăкрах пулни социаллă тĕллевсене пурнăçлассине тивĕçтерме май панине пысăка хурса хакланă. Çавăн пекех вăл çитес çул та бюджет кăçалхи пекех темиçе хут тỹрлетỹсем кĕртме тивессе шанать, эппин, тупăш тата пысăкланĕ.

Форума пухăннă

Декабрĕн 5-мĕшĕнче Раççейре Ырă тăвакансен кунне паллă тăваççĕ. Çак уява халалласа И.Н.Ульянов ячĕллĕ Чăваш патшалăх университетне ырă ĕç тăвакансем (волонтерсем) форума пухăннă. ЧР Пуçлăхĕ Олег Николаев форума пухăннă хастарсене саламланă май пĕр-пĕрне пулăшасси - нимене пухăнасси - чăвашсен авалтан пыракан йăла пулнине те аса илтернĕ. Ырă тăвакансемпе ыр кăмăллăх организацийĕсен йышĕпе республика ТОП-10 йышне кĕнĕ.

Кĕпе парнеленĕ

Ноябрĕн 26-мĕшĕнче кун çути курнă ачасене пурне те чăваш тĕррипе эрешленĕ кĕпе парнеленĕ. Ыр кăмăллăх акцине республикăра пĕлтĕр пуçарса янă. Çак парнесемпе Чăваш тĕррин кунĕ умĕн ача çуратмалли çуртсене тивĕçтернĕ. Кĕпе çинчи илемлĕ эрешсем ачалăх, ăнăçлăх, çураçу паллисене сăнлаççĕ.

"Рунă çулĕпе"

"Туризм.РФ" корпораци Чăваш Республикинче "Рунă çулĕпе" турмаршрут хатĕрлеме пулăшĕ. Турмаршрута республикăн аталану стратегине кĕртнĕ. ЧР Пуçлăхĕ Олег Николаев каланă тăрăх, 2024 çулччен Чăваш Енре наци хăйне евĕрлĕхне кăтартакан 11 объект тумалла: этнопарксем, туризм центрĕсем, уйрăм лапамсем тата ытти те. Туризм маршрутне 12 региона кĕртме палăртнă. Вĕсенче рунăпа çыхăннă палăксем сыхланса юлнă. Культура сох-е Уяв планне хатĕрлеççĕ Çитес çул Республика кунĕ Шупашкарта тата Куславкка районĕнче иртĕ. Çак чыса Куславккасем конкурсра çĕнтерсе тивĕçнĕ. Халĕ ЧР Министрсен Кабинечĕ уяв мероприятийĕсен планне çирĕплетес тĕлĕшпе ĕçлет.

Денис Спирин Шупашкар хула администрацине ертсе пырĕ

Шупашкар хула администрацине Денис Спирин ертсе пырĕ. Шупашкар хулин депутачĕсен Пухăвĕн ларăвĕнче сити-менеджера палăртма сасăлав иртнĕ. Депутатсен икĕ кандидатран суйлама тивнĕ. Вĕсем пĕр шухăшлă пулса Денис Спириншăн сасăланă. Сăмах май, Красноармейски муниципалитет округĕн пуçлăхĕ пулма вырăнти депутатсем Борис Клементьева шаннă. Ноябрĕн 23-мĕшĕнче Çĕмĕрле муниципалитет округĕн пуçлăхне Лев Рафинова çирĕплетнĕ.

Çĕнтерỹçĕсене чыслĕç

Чăваш Енре обществăпа çыхăнса ĕçлекен професси ăсталăхĕн "PRофи-21" конкурсĕн финалне çак тытăмра вăй хуракан 32 специалист тухнă. Конкурса 79 заявка тăратнă. Финалта конкурса хутшăнакансем республика бренчĕсемпе имиджне аталантармалли PR-проекта - ушкăнпа, пĕр-пĕр отрасльпе организацин аталанăвĕн докуменчĕсене тĕпе хурса пресс-релиз хатĕрлесси çинчен калаçĕç. Финал декабрĕн 3-мĕшĕнче иртĕ.