ПРАВОСЛАВИ тĕн йăли-йĕркине тытса пыракансемшĕн иккĕмĕш эрне (ноябрĕн 28-мĕшĕнче пуçланчĕ) Раштав типпи пырать. Вăл 2022 çулхи январĕн 6-мĕшĕччен тăсăлать. Çак тапхăрта туй кĕрлеттерекенсем те, ытти шавлă мероприяти ирттерекенсем те сахал. Çапах Вăтаелĕнчи Валентин Николаевичпа Елизавета Феоктистовна Ложкинсене, Шăхачри Николай Петровичпа Александра Васильевна Стефейкинсене, Патăрьелĕнчи Александр Ильичпа София Гавриловна Волковсене ылтăн (50 çул пĕрле), Тури Чакăри Леонид Никоновичпа Евгения Семеновна Сюзюкинсене, Шăнкăртамри Памир Мудировичпа Халидя Ахметовна Салиховсене изумруд (55 çул пĕрле) туйсен ячĕпе çывăх çыннисемпе пĕрлех район, ял тăрăхĕн администрацийĕсен ĕçченĕсем те салам сăмахĕсене çитерессе шансах тăратпăр.