Район администрацийĕн пуçлăхĕ Рудольф Селиванов коронавирус сарăлассине чарас енĕпе ĕçлекен оперативлă штабăн черетлĕ ларăвне ирттерчĕ.

Унта районти тĕп больница врачĕ Николай Тинюков паянхи кун Юхмапа Пăла тăрăхĕнчи 14 ялти 23 çын коронавирус инфекцийĕнчен сипленнине палăртрĕ. Чир ан çулăхтăр тесен вакцина яртармаллине аса илтерчĕ. Района коронавирус алхасма пуçланăранпа 20250 доза илсе килнĕ. Паянхи куна 17320 çын прививка тутарнă. Кăмăл пуррисем вакцина яртарма 122 номерпе çыхăнса çырăнма пултараççĕ. Поликлиника регистратуринче те вĕсен ыйтăвне тивĕçтереççĕ. Врач патне кайсан та кăмăлтан йышăнаççĕ. Е Патшалăх пулăшăвĕсен пĕрлехи порталĕ урлă харкам-хăй кабинетне кĕме май тупмалла çеç.

«Район территорийĕнче куллен администраци, полици, Роспотребнадзор ĕçченĕсем, ял тăрăхĕн пуçлăхĕсем йĕркене пăхăннине тишкерсе рейдсем ирттереççĕ. Обществăлла транспорта, суту-илỹ точкисене, вĕрентỹ учрежденийĕсене, обществăлла апатлану предприятийĕсене, çын ытларах йышлă пулакан вырăнсене çитеççĕ»,- терĕ оперативлă штаб председателĕ, райадминистрацин ятарлă программăсен пайĕн начальникĕ Григорий Каллин.

Ларăва пĕтĕмлетнĕ май Рудольф Селиванов тĕрĕслев ушкăнĕсен ĕçне лайăхлатмаллине, çынсем хушшинче ăнлантарăва яваплăрах туса пымаллине палăртрĕ. Прививка тутарассине мала хума сĕнчĕ.

Районăн хисеплĕ çыннисем! Çакна асра тытăр. COYID-19-тан прививка тутарни иммунитета ỹстерет. Çакă хăвăрăн тата çывăх çыннăрсен сывлăхне упрама май парать.

А. ИВАНОВА.