"Пысăк тăхтав" финалисчĕсене чысланă

Чăваш Республикин Пуçлăхĕ Олег Николаев пултаруллă ачасемпе çамрăксен "Эткер" центрĕнче "Пысăк тăхтав" конкурсăн финалисчĕсемпе тĕл пулнă, вĕсене Тав хучĕпе чысланă. Пĕтĕм Раççейри "Пысăк тăхтав" конкурсăн иккĕмĕш сезонĕ кăçалхи мартăн 28-мĕшĕнче пуçланнă. Унта аслă классенче вĕренекенсем çеç мар, 5-7-мĕш классенче, çавăн пекех професси пĕлĕвĕ паракан вĕрентỹ учрежденийĕсенче пĕлỹ пухакан пуçаруллă çамрăксем те хутшăнма пултарнă. Кăçал çак проекта 2,5 млн шкул ачи хутшăннă, 1500-шĕ финала тухма пултарнă. Финал Пĕтĕм тĕнчери "Артек" ача-пăча центрĕнче иртнĕ. Унта Чăваш Енрен 15 вĕренекен хутшăннă, пиллĕкĕшĕ гранта тивĕçнĕ.

Экономикăн аслă канашĕ ĕç мелне улăштарать

 Кăçал аслă канаш ларăвĕсене территори принципне тĕпе хурса ирттернĕ, вĕсенче муниципалитетсен комплекслă программисене, инвестици тата инфратытăм проекчĕсене пурнăçлассипе çыхăннă ыйтусене пăхса тухнă. 2022 çулта Экономикăн аслă канашĕн членĕсем отрасльсен аталанăвне тишкерĕç.

Тарифсем июль уйăхĕнчен ỹсеççĕ

Правительство çуртĕнче граждансем коммуналлă хуçалăх ĕçĕсемшĕн хывакан тỹлевсен 2022 çулхи виçине пăхса тухнă. ЧР Конкурентлă политика тата тарифсен патшалăх службин ертỹçи Надежда Колебанова пĕлтернĕ тăрăх, хаксем 2022 çулхи июлĕн 1-мĕшĕнчен хăпараççĕ. Республикăри 265 муниципалитетра ỹсĕм 3,4 процентпа, 11 муниципалитетра 5,4 процентпа танлашĕ. "Чăваш Енре ỹсĕм Раççей Федерацийĕн Правительстви палăртнă виçерен пысăкрах пулмĕ", - тенĕ вăл.

Ятарлă сайт уçнă

Чăваш Енĕн мухтавлă ывăл-хĕрĕ пирки землякичувашии.рф. сайтра паллашма пулать. Çитес çул Паллă ентешсен çулталăкĕ пулнă май ятарлă сайт уçнă. Унта хальлĕхе 16 çыннăн биографине вырнаçтарнă. "Паллă ентешсем" пая та пуянлатаççĕ. Хальлĕхе унта Чăваш Ен аталанăвне пысăк тỹпе хывнă 30 ытла çыннăн ятне кĕртнĕ. "Паттăрсем - пирĕн хушăрах" пая хатĕрлемешкĕн республикăра пурăнакансем те хутшăнма пултараççĕ. Кашнинех сумлă çын пирки çырса кăтартма май пур.

Грант парĕç

 Республикăри пĕчĕк тата вăтам бизнеса аталантарма курăмлă пулăшу параççĕ. Çав шутра "Перспектива" программăпа грант та уйăраççĕ. Паллах, патшалăх пулăшăвне илес тесен бизнес-план хатĕрлесе конкурса хутшăнмалла. ЧР ял хуçалăх министрĕ Сергей Артамонов палăртнă тăрăх, 2022 çулта сыр пĕçерес, пулă ĕрчетес енĕпе ĕçлекенсене курăмлă пулăшу памалла. Конкурсра çĕнтернисене бизнес-плана пурнăçа кĕртмешкĕн 10 млн тенкĕччен грант уйăраççĕ. Республика бюджетĕнчен çак тĕллевпе 125 млн тенкĕ тăкаклама пăхнă.

Сумлă конкурсра çĕнтернĕ

 Чăваш шăрттанĕ çĕршывĕпе чапа тухнă. Пĕтĕм Раççейри "Турист сувенирĕ" конкурсра вăл "Гастрономи сувенирĕ: апат-çимĕç" номинацире çĕнтернĕ. Кăçал конкурсăн регионти тата округри тапхăрĕсене çĕршыври 66 регионтан 2 пин ытла заявка йышăннă. 400 бренд финала тухнă. Çав шутра Етĕрнере туса кăларакан шăрттан та.