Пресс-конференци иртнĕ

Çĕнĕ команда йĕркелĕвĕ, транспорт, çулсем, хула тирпейлĕхĕ, туризм аталанăвĕ — тĕп хулан çĕнĕ сити-менеджерĕн Денис Спиринăн массăллă информаци хатĕрĕсен представителĕсем валли йĕркеленĕ пĕрремĕш пресс-коференцийĕ çак тата ытти ыйту тавра пулнă. Çул çӳрев тенĕрен, администрацин çĕнĕ ертӳлĕхĕ малашлăха электротранспорт аталанăвĕнче курать. Çавна май электричество вăйĕпе ĕçлекен транспорт валли заправка пункчĕсем кирлĕ пулĕç. Ку енĕпе ĕç пырать — Чăваш Ен пилот проектне кĕнĕ, çав пунктсем троллейбус управленийĕн электричествăпа тивĕçтерекен хăват подстанцийĕсен, пысăк суту-илӳ комплексĕсен таврашĕнче вырнаçĕç. «Европа электротранспорт çине куçать — эпир те çак çулпа кайăпăр», — тенĕ сити-менеджер.

Вăрлăх пахалăхне тĕрĕсленĕ

Республикăра çур аки валли вăрлăх хатĕрлес ĕç малалла пырать. Январĕн 31-мĕшĕ тĕлне Чăваш Енри ял хуçалăх организацийĕсенче тата фермер хуçалăхĕсенче çурхи тырă тата пăрçа йышши культурăсен вăрлăхне 43,9 пин тонна чухлĕ тĕрĕсленĕ. Пахалăхпа тивĕçтерекен вăрлăх пайĕ 67 процентпа /е 29,2 пин тоннăпа/ танлашать. Пĕлтĕр ку виçе 77 процентпа /34,3 пин тонна/ танлашнă. Хĕрлĕ Чутай районĕнче тĕрĕслев тухнă пур вăрлăх та пахалăхпа тивĕçтерет. Çĕрпӳ районĕнче те ку шай пысăк — вăрлăхăн 98 проценчĕ тĕрĕслеве ăнăçлă тухнă, Комсомольски районĕнче вара — 85 процент. Пĕтĕмпе 8 муниципаллă район лайăх кăтартупа савăнтарать.

Мухтавлă ентешсене тĕпчеççĕ

6-11-мĕш классенче вĕренекенсемпе педагогсем халăх историйĕшĕн пĕлтерĕшлĕ ĕç тума пултараççĕ. Çак тĕллевпе вĕсен пултаруллă ачасемпе çамрăксен «Эткер» центрĕ ирттерекен «Чăваш çĕрĕн мухтавлă çыннисем. А-ран Я таран» республика конкурсне хутшăнмалла çеç. Тĕпчев ĕçĕсене февралĕн 25-мĕшĕччен йышăнаççĕ. Вĕсене «Манăн ентешсем — манăн мăнаçлăх», «Пирĕн тăрăхăн паттăрĕ» номинацисем валли хатĕрлеме пулать. Тĕпчев ĕçĕнче культурăра, вĕрентӳре, спортра, сывлăх сыхлавĕнче, ял хуçалăхĕнче е ытти сферăра пысăк çитĕнӳ тунă çыннăн историйĕ пулмалла. Ăна хатĕрленĕ чухне çынсем каласа панипе, аса илӳсемпе, архив материалĕсемпе, сăн ӳкерчĕксемпе усă курмалла. Чи ăнăçлă ĕçсем «Чăваш çĕрĕн мухтавлă çыннисем. А-ран Я таран» кĕнекере пичетленĕç.

GR-кодсем улшăннă

Ҫак кунсенче республикăра общество вырăнĕсене кĕнĕ чухне хăшĕ-пĕри GR-код вуланманнине асăрханă.  Куншăн пăшăрханма кирлĕ мар. Патшалăх пулăшăвĕсен порталĕнче информацие çĕнетнĕ. Ҫавăнпа коронавирусран вакцинациленнине çирĕплетекен сертификата малашне ятарлă пайра тупма пулĕ. Ун çинчен ăнлантарнă çыру Патшалăх пулăшăвĕсен порталĕнче кашнин патнех çитмелле пулнă.

Пĕчĕк ялсене  - интернет

2021 ҫулта Чӑваш Енри 5 пӗчӗк яла интернет ҫитернӗ. Кӑҫал пирӗн республикӑра 4G ҫыхӑну интернет ҫыхӑнӑвӗ ҫук ялсенчен 10 процентран кая мар вырӑна ҫитмелле. Патшалӑх пулӑшӑвӗсен порталӗнче ҫак енӗпе сасӑлав та йӗркеленӗ.

Театр ĕçченĕсен хăйсен хаçачĕ пулĕ

Чӑваш Енри Театр ӗҫченӗсен союзӗ хӑйӗн хаҫатне кӑларса тӑма йышӑннӑ. Вăл «Чувашия театральная» ятлӑ пулӗ. Ӑна уйӑхра пӗрре кӑларса тӑрӗҫ