Командăсем йĕркеленеççĕ

 Республикăри районсенче инвесторсемпе тата бизнеспа ĕçлекен командăсем йĕркеленеççĕ. Республика Пуçлăхĕн хушăвĕпе инвестици командисене пухас ĕçе ЧР Экономика аталанăвĕн министерстви тата Инвестици аталанăвĕн агенстви тытса пырĕç.

400 миллиона яхăн тенкĕ уйăрĕç

Чăваш Енри ялсенчи пурнăç условийĕсене лайăхлатма 400 миллиона яхăн тенкĕ уйăрма йышăннă. Муниципалитетсене çак укçа-тенкĕпе пуçаруллă 483 проекта, вĕсенчен 210-шĕ автоçулсене юсассипе çыхăннă, пурнăçа кĕртĕç. Кăçал 862 проект тăратнă. 424-шне пурнăçлама бюджета тепĕр хут пăхса тухнă чухне хушма укçа пăхса хăварĕç. Пĕлтĕр республика хулисенче 40, ялсенче 916 проект ĕçе кĕртнĕ.

Экотехнопарк пулĕ

 "ГазЭнергоСтрой" корпораци представителĕсемпе Чăваш Енре экотехнопарк тăвассине сỹтсе явнă. Компани патшалăх-уйрăм çын условийĕсемпе ĕçе пикенме хатĕр. Республикăра экотехнопарк валли тивĕçлĕ лаптăк, сăмахран, Çĕнĕ Шупашкарти ятарлă экономика зонинче, пур.

Хушма укçа килĕ

 Çитес виçĕ çул хушшинче Чăваш Ен спорт объекчĕсен строительстви валли хушма укçа килĕ. Республикăра икĕ "ăслă" лапам тата модульлĕ спорт залĕ тума палăртнă. Вĕсен вырăнне конкурс ирттерсе палăртĕç. Кăçал 20 миллион тенкĕ уйăрĕç, 2023 çулта - 20 миллион, 2024 çулта - 60 миллион. Каласа хăвармалла: çĕршыври 84 региона 9 миллиард ытла тенкĕ уйăрма палăртнă. Ку укçапа 280 ытла спорт объектне хута ямалла.

Квотăсем улшăнмаççĕ

 Республикăн инвалидсем валли ĕç вырăнĕсене квотăламалли саккунне кĕртме сĕннĕ улшăнусем çинчен тĕплĕнрех каласа хăварни вырăнлă пулмалла. Чăваш Енре инвалидсене ĕçе йышăнмалли квотăсем улшăнмаççĕ, унчченхисемех юлаççĕ: 100 çын ытларах ĕçлекен предприятисемпе организацисемшĕн квота 3 процентпа танлашать, 35-рен тытăнса 100 çын таран ĕçлет пулсан - 2 процент. Анчах çĕнĕ нормăсемпе килĕшỹллĕн инвалидсемпе ĕç хутшăнăвĕсене официаллă йĕркепе çирĕплетсен кăна квота пурнăçланнă шутланать, хевтесĕр çынсем валли ĕç вырăнĕсем йĕркелени кăна шута кĕмĕ. ЧР Ĕçлев министрĕ Алена Елизарова пĕлтернĕ тăрăх, хальхи вăхăтра 100 ытларах çын вăй хуракан предприятисенче квота 83 процент пурнăçланать, 35-100 çын ĕçлекеннисенче - 89 процент.

Сăмах май, хальхи вăхăтра республикăра инвалидсене реабилитаци пулăшăвĕпе 494 организаци тивĕçтерет.

Санавиаци вĕçме тытăнĕ

 Чăваш Енре санавиаци вертолечĕ пациентсене больницăна хăвăртрах илсе çитерме пулăшать. Кăçал вăл февраль уйăхĕн варринче вĕçме тытăнĕ. Хальхинче те килĕшĕве "Вырăс вертолет тытăмĕсем" пĕрлешỹпе алă пуснă. Кăçал ăна 35,9 миллион тенкĕ парĕç. ЧР сывлăх сыхлавĕн министерстви пĕлтернĕ тăрăх, çулталăк вĕçлениччен сахалтан та 59 хутчен вĕçме палăртнă. Перекетлеме май пулсан 85 вĕçев пулĕ.

Сăмах май, пĕлтĕр санавиацишĕн 45,9 миллион тенкĕ тỹленĕ. Ку укçапа 53 вĕçев тума палăртнă. Анчах пирĕн республика пĕчĕк пулнине кура перекетлеме май килнĕ, 109 хутчен вĕçеве тухнă.