Раççей Журналисчĕсен союзĕн членĕ, Чăваш Республикин культурăн тава тивĕçлĕ ĕçченĕ, Митта Ваçлей ячĕллĕ преми лауреачĕ Владимир Васильевич Степанов журналист, писатель февралĕн 8-мĕшĕнче 60 çул тултарать. Вăл Упамсара 1962 çулта çуралнă.

В. Степанов - И.Н. Ульянов ячĕллĕ Чăваш патшалăх университечĕн выпускникĕ. Вăл Çĕрпỹ районĕнчи "Путь Октября" (халĕ "Цивильский вестник"), "Аван-и", "Паянтан" хаçатсенче корреспондент, республикăри вĕрентỹ институчĕн издательство уйрăмĕн редакторĕ, пай методисчĕ, "ЛИК Чувашии", "Халăх шкулĕ" журналсен сотрудникĕ, Санкт-Петербургри патшалăх инженерипе экономика факультечĕн Шупашкарти филиалĕн редакципе издательство пайĕн тĕп редакторĕ, "Тантăш" хаçатăн пай редакторĕ пулса ĕçленĕ. 2012-2016 çулсенче "Самант" журналăн редакторĕнче тăрăшнă, халĕ - Чăваш кĕнеке издательствин редакторĕ.

Литературăпа И.Н. Ульянов ячĕллĕ Чăваш патшалăх университетĕнче вĕреннĕ чух кăсăкланма пуçланă. Унăн материалĕсем "Хыпар", "Молодой коммунист", "Çамрăксен хаçачĕ", "Ар" тата ытти хаçатсенче кун çути курнă. Паллăрах призведенийĕсен шутне "Змея", "Рециепиент", "Звездная Вальхалла" тата ыттисем кĕреççĕ. Çавăн пекех истори тата литература статйисен авторĕ те.

Тĕп кĕнекисем: "Эфемероптера каçĕ", "Тенкри хĕçĕ". "Удивительные животные Чувашии" кĕнеки - "Малая Родина - 2020" конкурсăн финалисчĕ.

("Çулталăк кĕнекинчен")